पानीक बोतलमे मकरा रहल वाटर उद्योगके उत्पादन रोक्का
पहुरा समाचारदाता
धनगढी, ३० असार । कैलालीमे प्रशोधित पानीके बोतलमे मकरा भेटाइल वाटर उद्योगके उत्पादन रोक्का करल बा ।
कैलालीके बर्दगोरिया १ बौनियामे रहल आकाशगङ्गा वाटर एण्ड बेभेरेज प्राली उद्योगके उत्पादन रोक्का करल हो । प्रशोधित पानीके बोतलमे मकरा भेटाइल टमान मिडियामे प्रकाशित समाचार ओ जिल्ला प्रशासन कार्यालयसे प्राप्त निर्देशन बमोजिम खाद्य प्रविधि तथा गुण नियन्त्रण कार्यालय कैलालीके टोली उ उद्योगके स्थलगत अनुगमन करल रहे ।
खाद्य निरीक्षक तथा खाद्य विज्ञ टोलीसे स्थलगत अनुगमनके क्रममे स्वच्छता मापदण्ड सम्बन्धी कुछ बुँदामे सुधार कैना आवश्यक डेखल ओरसे सुधार नैहुइटसमके लाग उक्त उद्योगके उत्पादन रोक्का करल खाद्य प्रविधि धनगढीके प्रमुख नवराज दाहाल जानकारी डेलै ।
उहाँ उ उद्योगसे खाद्य ऐन अनुसार नमुना संकलन कैके अनुसन्धान प्रक्रिया समेत आघे बह्राइल समेत जानकारी डेलै । खाद्य प्रविधि तथा गुण नियन्त्रण कार्यालय धनगढी प्रमुख दाहाल आम उपभोक्ताहे पानी लगायतके खाद्य बस्तु खरिद करेबर सचेत हुइना ओ गुणस्तरके बिषयमे शंका लागलमे अस्टहेक उजुरी कैना समेत अपिल करले बाटै ।
