ऋष्टिणा करियाप्रधान थारुके ‘लकडाउन डायरी’ विमोचन
पहुरा समाचारदाता
धनगढी, ३२ असार । ऋष्टिणा करियाप्रधान थारुसे अंग्रेजी भाषामे लिखित ‘लकडाउन डायरीः पेन्डामिक, फेस्टिभल एण्ड रियालिटी’ पुस्तक काठमाण्डौंमे विमोचन हुइल बा ।
ठुम्रार साहित्यिक ओ सागितिक बखेरी शृङखला भाग ९१ के भव्य कार्यक्रममे संघीय सरकारके माननीय शहरी विकास मन्त्री मेटमणि चौधरी, वरिष्ठ साहित्यकार डा. कृष्ण सर्वहारी, थारु कलाकार राष्ट्रिय मन्च के केन्द्रीय अध्यक्ष विनय वैद्यसे विमोचन हुइल बा ।
१४ बर्षके ऋष्टिणाके वाग्मती प्रदेशके राजधानी हेटौंडामे आयोजित ऐतिहासिक प्रथम राष्ट्रिय बाल साहित्य उत्सव २०७९ मे सुदुरपश्चिम प्रदेशसे ‘राष्ट्रिय नव सर्जक पुरस्कर २०७९’ से सम्मानित तथा पुरस्कृत हुसेकल बटी । नेपाल प्रज्ञा प्रतिष्ठानके प्राज्ञ सद्स्य डा. देवी नेपाल ओ नेपाली बाल साहित्यके धरोहर प्रमोद प्रधानके हातसे सम्मान करल रहे ।
उहीसे आघे गैल जेठ २१ गते कैलाली जनपुस्तकालयके ६५ औं वार्षिकोत्सव कार्यक्रममे प्रदेश प्रमुख देवराज जोशी ओ सामाजिक विकास राज्यमन्त्री टेकबहादुर रैकासे संयुक्त रुपमे विमोचन हुसेकल बा ।
पुस्तकमे उहाँ थारु समुदायसे लकडाउन अवधिमे भोगल समस्यासहित अपन दैनिकी लगायतकाबारेमे उल्लेख करले बटी । ओस्टेक करके, उहाँ थारु समुदायके गुरही, अट्वारी, माघी लगायतके पर्वबारेफे पुस्तकमे उल्लेख करले बटी ।
