कैलारीके ठेपरिन्ह्यामे वृहत बृक्षारोपण कार्यक्रम सुरु

पहुरा समाचारदाता
हसुलिया, १ साउन । कैलालीके कैलारी गाउँपालिका वडा नम्बर ७ बसन्ती सामुदायिक वनमे अँटवारसे वृहत बृक्षारोपण कार्यक्रम सुरु हुइल बा ।

वडा नम्बर ७ स्थित बसन्ती सामुदायिक वन उपभोक्ता समुहके ठेपरिन्ह्या कना ठाउँके खाली रहल १६ विघा जमिनमे वृक्षारोपण करल हो । वृक्षारोपण कार्यक्रमके वडका पहुना गाउँपालिकाके उपाध्यक्ष भगवतीकुमारी चौधरी रहल रहिट । बृक्षारोपण कार्यक्रमके सुरुवाट करटी उहाँ रुखुवा मानव जीवनके लाग अतिआवश्यक रहल बटैली । उहाँ लगाइल रुखुवाके संरक्षण कैना सक्कुहुनके दायित्व रहल बटैली ।

सोम्बारसम हुुइना वृहत बृक्षारोपणमे टमान जातके १० हजार बोट विरुवा लगाई लागल गाउँपालिकाके योजना शाखा प्रमुख सन्तोषकुमार चौधरी बटैलै । गाउँपालिकाके आर्थिक सहयोगमे सब डिभिजन वन कार्यालय बसन्तामे तयार हुइल उ बोटविरुवा लगाई लागल उहाँ बटैलै ।

वृहत वृक्षारोपण कार्यक्रम नवजीवन सेवा संघके सहकार्यमे हुइल हो । अँटवारके रोज केल ५ हजार बोटविरुवा लगाइल संघके फिल्ड कोडनेटर प्रविन श्रेष्ठ जानकारी डेलै । वृक्षारोपण कार्यक्रममे बसन्ती सामुदयिक वनके अध्यक्ष जुगराम चौधरी, बसन्ता सामुदायिक वन उपभोक्ता समुहके अध्यक्ष बालकराम चौधरी, सब डिभिजन वन कार्यालयके प्रतिनिधि, बसन्ताके स्थानीयहुकनके सहभागितामे रहल बा ।