धनगढीमे विशेषज्ञ वडा स्वास्थ्य क्लिनिक सुरु

क्लिनिकमे १६२ जाने सेवा लेलैं

पहुरा समाचारदाता
धनगढी, १ सावन । धनगढी उपमहानगरपालिकाके ‘हाम्रो धनगढी हामी बनाउँछौं’ कार्यक्रम अन्तर्गत विशेषज्ञ वडा स्वास्थ्य क्लिनिक अँट्वारके रोज सुरु हुइल बा ।

धनगढी उपमहहानगरपालिका वडा नम्बर १९ के फूलवारी स्वास्थ्य चौकीमे एक कार्यक्रमेक बीच सुदूरपश्चिम प्रदेशके मुख्यमन्त्री त्रिलोचन भट्ट स्वास्थ्य क्लिनिक उद्घाटन करलैं ।

स्वास्थ्य क्लिनिकके उद्घाटन करटि मुख्यमन्त्री भट्ट सक्कु स्थानीय तहसे वडास्तरमे लक्षित वर्गहे स्वास्थ्य सेवा प्रदान करना कार्य अतिमहत्वपूर्ण रहल कटि यी कार्यक्रम सञ्चालनके लाग सक्कु स्थानीय तहहे आग्रह करल बटैं । उहाँ कलैं, “सुदूरपश्चिम प्रदेशके सक्कु स्थानीय तह दातृ निकाय खोजके प्रदेश सरकारसे समन्वय कैके स्वास्थ्य क्लिनिक चलैना जरुरी बा ।” उहाँ धनगढी उपमहानगरपालिकाके स्वास्थ्य क्लिनिक सञ्चालनके लाग सहयोग करल जानकारी करैटि अन्य स्थानीय तह फेन अइसिन काम करलेसे सहयोग करना प्रतिवद्धता व्यक्त करलैं ।

कार्यक्रममे उहाँ यी कार्यक्रमसे ग्रामीण क्षेत्रमे रहल विपन्न, गरिब, सीमान्तकृत तथा निन्मस्तरके वर्ग लाभान्वित हुइना विश्वास व्यक्त करलैं । उहाँ कलैं, “आर्थिक कारणसे अस्पतालमे जाके परिक्षण नैकराइ सेक्ना स्थानीय नागरिक यी स्वास्थ्य क्लिनिकसे सर्वसुलभ रूपमे उपचार कराइ पैहि ।” उहाँ जनताके सब्से लग्गेक सरकार स्थानीय सरकार रहल ओरसे फेन अइसिन कार्यक्रम स्थानीय तहसे सञ्चालन करेपरना बटैलैं ।

“समाज विकासके लाग भौतिक पूर्वाधारमे विकाससँगे सामाजिक विकास फेन आवश्यक रहठ,” उहाँ कलैं, “यी स्वास्थ्य क्लिनिकसे सामाजिक विकास अन्तर्गत सञ्चालन हुइल बा ।” उहाँ कौनो फेन भारी कार्यक्रम सञ्चालनके लाग सहकार्य ओ सहयोगके आवश्यकता रहल बटैलैं । ओस्टेके, औरे एक प्रसंगमे धनगढी बजारके मूल सडक स्तरोन्नतिमे प्रदेश सरकार उपमहानगरपालिकाहे पूर्ण रूपमे सहयोग करना प्रतिवद्धता व्यक्त करले रहैं ।

कार्यक्रमे सुदूरपश्चिम प्रदेश सभा सदस्य नेपालु चौधरी यी विशेषज्ञ वडा स्वास्थ्य क्लिनिकमे लाभ लेहे पैना लक्षित वर्ग सहजिलेसे सेवा पाइट कना अपेक्षा रहल बटैलैं । उहाँ यी स्वास्थ्य क्लिनिकमे गरिब, निमुखा, विपन्नहुकनके स्वास्थ्यमे सुधार अइना विश्वास व्यक्त करलैं । उहाँ कलैं, “यी स्वास्थ्य क्लिनिकमे सक्कु स्तरके नागरिकके सेवामे पहुँच रना विश्वास बा ।”

कार्यक्रमके बारे जानकारी करैटि धनगढी उपमहानगरपालिकाके नगरप्रमुख गोपाल हमाल पालिकाके आम जनता स्वास्थ्य सेवासे वञ्चित होके रोगी रहे नापरे ओ सबहे सर्वसुलभ स्वास्थ्य सेवा प्राप्त होए कना हेतुसे प्रत्येक महिना तालिका अनुसार सक्कु १९ ठो वडामे निःशुल्क स्वास्थ्य सेवा प्रदान करना व्यवस्था रहल बटैलैं ।

उहाँ यी क्लिनिक सेवा सञ्चालनमे भाटभाटेनी सुपर मार्केटके प्रबन्ध निर्देशक मीनबहादुर गुरुङसँग २ जाने चिकित्सकके पारिश्रमिकके लाग ५ वर्षसम तलब भत्ता डेना सम्झौता हुइल जानकारी करैलैं । ओस्टेके, क्लिनिक सेवा सञ्चालनके लाग सुदूरपश्चिम प्रदेश सरकार सामाजिक विकास मन्त्रालयसे २५ लाख बराबरके स्वास्थ्य उपकरण सहयोग करल बटैलैं ।

ओस्टेके, उहाँक सुविधाके लाग उपमहानगरपालिकासे डेहल गाडी क्लिनिक सञ्चालनमे प्रयोग करल बटैं । यी कार्यक्रम सफल होए उद्देश्यसे यी क्षेत्रके औषधि व्यवसायीहुक्रे औषधि उपलब्ध कराइल नगरप्रमुख हमाल जानकारी करैलैं । उ क्लिनिक सेवामे निःशुल्क रूपमे ओपीडी सेवा, अल्ट्रासाउण्ड सेवा, रगत जाँच, ईसीजी सेवा ओ उपलब्ध रहटसम निःशुल्क औषधि फेन वितरण करना जनागिल बा ।

उ विशेष वडा स्वास्थ्य क्लिनिकमे निःशुल्क सेवा पाके स्थानीय उत्साहित हुइल बटैं । यहाँ उपचार कराइ आइल टमान जाने आर्थिक अभावमे उपचार कराइ नैपाइल ओ यी स्वास्थ्य सेवासे अप्नहुकनहे सहयोग हुइल बटैलैं ।

अँट्वारके रोज सुरु हुइल विशेषज्ञ वडा स्वास्थ्य क्लिनिकमे १६२ जाने सेवा लेले बटैं । क्लिनिकमे १०८ जाने जनरल फिजिसियन सेवा, ५४ जाने स्त्री तथा प्रसूति रोग विशेषज्ञ सेवा, ३४ जाने प्रयोगशाला सेवा, १७ जाने ईसीजी सेवा, १४ जाने गर्भवती महिला ओ ३ जहनहे रिफर करल बा । उमध्ये २२ जाने ७० वर्षसे ढेर उमेरके नागरिक सेवा लेले रहैं ।

धनगढी उपमहानगरपालिकाके उपप्रमुख कन्दकला राना स्वागत कार्यक्रममे वडा नम्बर १९ के वडाध्यक्ष बाँधुराम चौधरीलगायत मन्तव्य व्यक्त करले रहैं । कार्यक्रमके सञ्चालन सिद्धराज पनेरू करले रहैं ।