अभिन २३ सय ७५ जाने पुनर्स्थापनासे बाँकी
पहुरा समाचारदाता
धनगढी, २ सावन । आज मुक्त कमैया दिवस अर्थात् कमैयाहुक्रे दासत्वके जंजिरसे मुक्ती पाइल दिन । सरकार कमैयाहुकन २०५७ साल सावन २ गते मुक्ती घोषणा करल मने अभिन पुनर्स्थापना करे नैसेकल हो । मुलुक परिवर्तन हुइल, व्यवस्था फेरल मने मुक्त कमैयाके अवस्थामे परिवर्तन हुई नैसेकल मुक्तकमैया समाजके केन्द्रीय अध्यक्ष पशुपति चौधरी बटैलै ।
मुक्त कमैयाहुक्रे दिवसहे खुशीयालीके रुपमे मनाई पर्ना हो । मने, हकअधिकारके लाग अभिन सडकमे उत्रे पर्ना अवस्था रहल समाजके केन्द्रीय अध्यक्ष चौधरीके कहाई बा ।
“कैलाली, कञ्चनपुर, बाँके, बर्दिया ओ दाङ जिल्लामे मुक्त कमैया समस्या बा,” उहाँ कहलै, “अभिनसम बाँके जिल्लामे केल मुक्त कमैया समस्या समाधान हुइल बा । आर्थिक वर्ष २०७८/०७९ के असार मसान्तसम चार जिल्लामे अभिन २ हजार ३ सय ७५ जाने मुक्त कमैया पुनर्स्थापनासे वञ्चित रहल बटै ।”
सबसे ढेर बर्दियामे १२ सय ४५ जाने मुक्त कमैया पुनस्र्थापनासे वञ्चित हुइल अध्यक्ष बटैलैं । ओस्टेक, कैलालीमे ९ सय ५३ जाने, कञ्चनपुरमे १२९ जाने ओ दाङमे ४८ जाने पुनर्स्थापना हुइना बाँकी रहल बटैलैं ।
२०५७ साल सावन २ गते कमैया मुक्ती घोषणापाछे सरकार पाँच जिल्लाके २७ हजार ५ सय ७० जनहनहे जग्गा डेना कहलमे अब्बेसम २५ हजार १९५ जनहन केल जग्गा डेहल मुक्त कमैया समाजके अध्यक्ष बटैलै ।
पुनस्र्थापनाके नाउँमे जग्गा नैरहल ठाउँक लालपुर्जा, व्यक्तिके नम्बरी जग्गाके लालपुर्जा, लडिया, खोला रहल ठाउँमे टमान मुक्तकमैयाहुकन जग्गा डेहल उहाँ बटैलै । ओसिन समस्या सट्टाभर्ना कैना संख्या ६ सय ६१ रहलफे उहाँ जनैलै ।
ओस्टेके, करके परिचय बदर हुइल संख्या १७३, जग्गा नइपाइल ४६३, परिचयपत्रसे वञ्चित १ हजार ७८ जाने करके कुल २ हजार ३ सय ७५ जाने पुनर्स्थापना हुइना बाँकी रहल केन्द्रीय अध्यक्ष पशुपति बटैलैं ।
कैलाली जिल्लामे कुल जग्गा पाइ पर्ना संख्या ८ हजार ९७५ हो मने ८ हजार २२ जाने केल जग्गा पैले बटै । यहाँ सट्टा भर्ना ४ सय, परिचयपत्र बदर १७३, जग्गा पैनासे शुद्ध संख्या ३८० करके ९५३ जाने पुनर्स्थापनासे वञ्चित बटैं ।
कञ्चनपुरमे कुल जग्गा पाइ पर्ना संख्या ४ हजार ४१८ हो, मने ४ हजार २८९ जाने केल जग्गा पैले बटै । यहाँ सट्टा भर्ना १२९ करके १२९ जाने पुनर्स्थापनासे वञ्चित बटैं ।
ओस्टेके, करके बर्दिया जिल्लामे कुल जग्गा पाइ पर्ना संख्या ११ हजार ५५१ हो मने १० हजार ३०६ जाने केल जग्गा पैले बटैं । यहाँ सट्टा भर्ना ८४ जाने, जग्गा पैनासे शुद्ध संख्या ८३ जाने, परिचयपत्रसे वञ्चित १ हजार ७८ जाने करके १२ सय ४५ जाने पुनर्स्थापनासे वञ्चित बटैं । बाँके जिल्लामे १९ सय २१ जाने मुक्त कमैया रहलमे सक्कु जनेक पुनर्स्थापना हुसेकल बा ।
ओस्टके, दाङ जिल्लामे कुल जग्गा पाइ पर्ना संख्या ७ सय ५ जाने हो, मने ६५७ जाने केल जग्गा पैले बटैं । यहाँ सट्टा भर्ना ४८ करके पुनर्स्थापना हुइना मुक्त कमैयाके संख्याफे ४८ जाने मुक्त कमैया समाज जनैले बा ।
२२ औं मुक्तकमैया दिवस आज (सोम्मार) धनगढीमे सुदूरपश्चिम प्रदेशके मुख्यमन्त्री त्रिलोचन भट्टके प्रमुख आतिथ्यमे मनाई लागल बा, कलेसे पालिकास्तरमे मुक्ती दिवसके आयोजना करल समाजके केन्द्रीय अध्यक्ष पशुपति चौधरी बटैलैं ।
ओस्टेके, करके भजनी नगरपालिका आज (सोम्मारके दिन) पहिल चो मुक्त कमैया दिवसके अवसरमे सार्वजनिक बिदा डेना निर्णय करले बा ।
ओस्टेके, करके भजनी नगरपालिका ओ टीकापुर नगरपालिका आज पहिल चो मुक्त कमैया दिवसके अवसरमे सार्वजनिक बिदा डेना निर्णय करले बा ।
