राज्यमन्त्री रैकासे वडा क्लिनिकके समुद्घाटन
पहुरा समाचारदाता
धनगढी, २ सावन । धनगढी उपमहानगरपालिकामा विशेषज्ञ चिकित्सक सहित वडा क्लिनिक सेवा सञ्चालन करल बा ।
सुदूरपश्चिम प्रदेश सरकार सामाजिक विकास मन्त्रालय, धनगढी उपमहानगरपालिका ओ टमान संघसंस्थाके सहयोगमे उ सेवा सुरु करल हो । सोम्मार एक विशेष समारोहके विच धनगढी उपमहानगरपालिकाके १८ नम्बर वडास्थित आधारभूत स्वास्थ्य केन्द्रमे सुदूरपश्चिम प्रदेशके सामाजिक विकास राज्यमन्त्री टेक बहादुर रैका वडा क्लिनिक समुद्धघाटन करले बटै ।
कार्यक्रमके वडका पहुना सामाजिक विकास राज्यमन्त्री टेकबहादुर रैका आम जनता स्वास्थ्य सेवासे बञ्चित हुइटी रोगी हुके बाँचे नपरे ओ सक्कुहुनहे सर्बशुलभ स्वास्थ्य सेवा प्राप्त होए कना उद्देश्यसे संचालन करल वडा क्लिनिक सेवासे आम जनताहे गाउँघरमे प्रत्यक्ष रुपमे फाईदा पुग्न विश्वास व्यक्त करलै । वडा क्लिनिकसे जनता महिनाके एक दिन विशेषज्ञ चिकित्सक सहितके टोली मार्फत उपचार पैही ।
उपमहानगरपालिका भिटर रहल १९ ठो वडामे महिनामे एक चो अनिवार्य रुपमे सञ्चालन हुइना वडा क्लिनिकमे अल्ट्रासाउण्ड, ईसीजी, रगत, दिसा पिसाबके जाँच निःशुल्क हुई कलेसे औषधिफे निःशुल्क वितरण कैना जनाइल बा । सेवा सञ्चालन शुभारम्भ कार्यक्रममे धनगढी उपमहानगरपालिकाके उपप्रमुख कन्दकला राना, धनगढी उपमहानगरपालिका वडा नं १८ के अध्यक्ष भुवन रिजाल, वडा नं १९ के अध्यक्ष बाँधुराम चौधरी लगायत मन्तब्य राखल रहिट ।
