पञ्चेश्वरके एम्बुलेन्स पाँच महिनासे धनगढीमे

पहुरा समाचारदाता
धनगढी, ३ सावन । बैतडीके पञ्चेश्वर गाउँपालिकाके एम्बुलेन्स ५ महिनासे धनगढीमे थन्कल बा । गाउँपालिकाके एम्बुलेन्स धनगढीमे थन्कल ५ महिनासे ढिउर हुइलेसे फेन पालिका चासो डेले नैहो । एम्बुलेन्स नैहोके बिरामी सास्ती भोगेबर समेत एम्बुलेन्स लन्ना बिषयमे पालिकासे चासो नैडेहल स्थानिय गुनासो करले बाटै ।

उ एम्बुलेन्स ५ महिना आघे धनगढीमे मोटरसाइकलहे ठक्कर डेहलपाछे एम्बुलेन्स प्रहरीके नियन्त्रणमे रहल बा । सुदूरपश्चिम प्रदेश सरकारसे गाउँपालिकाहे उपलब्ध कराइल एम्बुलेन्स ५ महिनासे थन्कल रलेसे फेन उहीहे प्रयोगमे लन्ना बिषयमे प्रयास नैकरल हो । गाउँपालिकामे एम्बुलेन्स नैहोके बिरामी भर सास्ती भोग्टी रहल बाटै । कलेसे आकस्मिक बिरामीनहे अन्यत्र लैजैना समस्या हुइल स्थानीय जयबहादुर चन्द बटैलै । पञ्चेश्वर गाउँपालिकाके एम्बुलेन्स चालकसंग हलुका सवारी साधनके किल लाइसेन्स रहल ओ एम्बुलेन्स हेबी रहल ओरसे हेबी सवारी साधनके लाइसेन्स रहल चालक रख्ना फेन प्रहरी कहले बा ।

यहोर गाउँपालिकाके स्वास्थ्य शाखा प्रमुख रामसागर शाह ५ महिनासे एम्बुलेन्स धनगढीमे थन्कल स्वीकरलै । एम्बुलेन्ससे ठक्कर डेहल मोटरसाइकलके पाटपूर्जा मगाके मर्मत करे पर्ना रहल ओरसे ढिलाइ हुइल बा उहाँ कहलै ।‘इ बिषयमे स्वास्थ्य शाखासंग खासे समन्वय हुइल नैहो, मने मोटरसाइकल मर्मत नैहोके एम्बुलेन्स रोकल महिलन जानकारी बा, उहाँ कहलै । पञ्चेश्वर गाउँपालिकाके एम्बुलेन्स ५ महिनासे धनगढीमे रहल जानकारी जिल्ला एम्बुलेन्स व्यवस्थापन समितिहे समेत रहल बा ।

एम्बुलेन्स जैसिन संवेदनशील साधन ५ महिना थन्कल समेत चासो नैडेहल कहटी जनप्रतिनिधिहुक्रनके आलोचना हुइल बा । अत्यावश्यक साधनके रुपमे रहल एम्बुलेन्स सञ्चालन ओ व्यवस्थापनमे पालिका ध्यान नैडेहल कहटी आलोचना हुइल हो । स्वास्थ्य कार्यालय बैतडीके प्रमुख योगेशप्रसाद भट्ट थन्कल एम्बुलेन्स लानक लाग आग्रह करल बटैलै ।