हिंसा अन्त्यके लाग पितृसत्तात्मक सोँच परिवर्तन आवश्यक
पहुरा समाचारदाता
धनगढी, ४ सावन । सुदूरपश्चिम प्रदेशके सामाजिक विकास राज्यमन्त्री टेकबहादुर रैका बालबालिकाउपर हुइना हिंसा अन्त्यके लाग पितृसत्तात्मक सोँच परिवर्तन करे पर्ना बटैले बाटै ।
नेपाली समाज पितृसत्तात्मक सोँचमे गुज्रल कारण बालबालिकाउपर व्यक्ति, परिवार ओ समाजसे नै हिंसा हुइना करल ओरसे राज्यमन्त्री रैका पितृसत्तात्मक सोँच परिवर्तन करे पर्र्ना औंल्याइल हुइट । महिला पुर्नस्थापना केन्द्र(ओरेक)के आयोजनामे बुधके धनगढीमे बालबालिकाउपर हुइना हिंसाके रोकथाम ओ प्रतिकार्य सेवाके पैरवीके लाग कार्याशाला गोष्ठी हुइल रहे ।
कार्यक्रमके बर्का पहुना समेत रहल राज्यमन्त्री रैका पितृसत्तात्मक सोँच तथा रुढीबादी परम्पराके कारणसे घर परिवार तथा सामाजमे बालकसे बालिका ढिउर हिंसा खेपे पर्ना फेन उहाँ बटैलै ।
‘घरपरिवार तथा समाजमे बालबालिकाउपर ढिउर हिंसा हुइना करठ्, उ हमार पितृसत्तात्मक सोँच तथा रुढीबादी परम्पराके कारणसे हो’, राज्यमन्त्री रैका कहलै– ‘हिंसा रोकथाम तथा हिंसारहित घरपरिवार, समाज निर्माणके लाग हम्रे उ सक्कु परम्परागत सोँच परिवर्तन कैना आवश्यक रहल बा ।’
व्यक्तिके सोँच तथा मानसिकता परिवर्तन नैहुइटसम उहाँ जैसिन फेन कानून निर्माण ओ कार्यान्वयन कैलेसे फेन बालबालिकाउपर हुइना हुइटी रहल बटैलै ।
कार्यक्रमहे सम्बोधनके क्रममे उहाँ प्रदेश सरकारसे बालबालिकाउपर हुइना हिंसा रोकथामके लाग नीतिगत रुपमे आघे बह्रल बटैलै । प्रदेश सरकारसे उहाँ बालबालिकाहे आत्मरक्षा लगायतके तालिम, टमान सचेतनामूलक क्रियाकलाप, टमान संघसंस्था तथा सरोकारवाला निकायसंग समन्वय सहकार्य कैके बालबालिकाउपर हुइना हिंसा रोकथामके कार्यक्रम समेत कैटी रहल बटाइल रहिट ।
धनगढी उपमहानगरपालिकाके उपप्रमुख कन्दकला राना पुरुषबादी सोँच तथा चिन्तनके कारण घरपरिवार, समाजमे बालबालिका ओ महिलाउपर हिंसा हुइना करल बटैली । बालबालिका तथा महिलाउपर हुइना हिंसा अन्त्यके लाग उप्रमुख राना पुरुषबादी सोँच ओ चिन्तन छोरे पर्ना बटाइल रही ।
कार्यक्रममे अन्य सहभागीहुक्रे फेन परम्परागत सोँच, रुढीबादी परम्परा लगायतके कारणसे घरपरिवारभित्रे बालबालिकाउपर हिंसा हुइना करल बटाइल रहिट । उहाँहुक्रे उक्त हिंसा अन्त्यके लाग घरपरिवार समुदाय भेदभाव रहित बनैना, अभिभावकसे बालबालिकाहे प्रायाप्त समय डेना, बालबालिकाहुक्रनके समान सहभागिता, हानिकारक परम्पराहे निरुत्साहन, बालमैत्री परिवारिक वातावरणके सृजना, सेवाप्रादायक संस्थासे डेना सेवासुविधा बालमैत्री हुइ पर्ना ओ स्थानीय सरकारसे विशेष कैके बजेट नीति तथा कार्यक्रम लानके उहीहे प्रभावकारी रुपमे कार्यान्वयन करे पर्ना सुझाव डेहल रहिट ।
कार्यक्रम ओरेक नेपालके सदस्य संगीता अधिकारीके अध्यक्षतामे हुइल रहे । कार्यक्रमके उद्देश्यबारे ओरेक वुटवलके संयोजक प्रभा पौडेल जानकारी कराइल रही कलेसे कार्यक्रमके सञ्चालन ओरेक कैलाली जिल्ला संयोजक विनु राना करल रही ।
कार्यक्रममे कैलालीके १३ स्थानीय तहके उपप्रमुख, न्यायिक समितिके सदस्य, टमान सरोकारवाला निकायके पदाधिकारी लगायतके सहभागिता रहल रहे ।
