माग सम्बोधनके लाग मुख्यमन्त्रीहे ध्यानाकार्षण
पहुरा समाचारदाता
धनगढी, ५ सावन । आपन राखल माग प्रदेश सरकारसे सम्बोधन नैकरल कहटी मुक्तकमलरीहुक्रे सुदूरपश्चिम प्रदेशके मुख्यमन्त्री त्रिलोचन भट्टहे भेट् करले बाटै ।
बिफेक रोज मुक्त कमलरी विकास मञ्च कैलाली अध्यक्ष बिन्द्रा चौधरी ओ कञ्चनपुर अध्यक्ष सीता डगौंराके अगुवाईमे गैल टोलीसे मुख्यमन्त्री भट्टहे भेट करल हुइट । भेटमे उहाँहुक्रे आपन राखल टमान माग सहितके ज्ञापनपत्र कार्यान्वयनके लाग मुख्यमन्त्री भट्टहे ध्यानाकार्षण कराइल रहिट ।
भेटके क्रममे मुख्यमन्त्री भट्ट मुक्तकमलरीनके लाग प्रदेश सरकारसे टमान मेरके कार्यक्रम कैटी रहल बटैलै । उहाँ निःशुल्क उच्च शिक्षा, छात्रवृति ओ सीप लगातयके क्षेत्रमे सहयोग कैटी आइल बटैलै । मने उहाँ आपनहुक्रन संग मुक्तकमलरीनके सही तथ्यांक नैरहल ओरसे उपलब्ध करैना आग्रह करलै । उहाँ मुक्तकमलरीनके सही तथ्यांक नैहोके छात्रवृति, तालिम लगायत कार्यक्रमके लाग बजेट विनियोजन तथा कार्यान्वयनमे समस्या हुइना बटाइल रहिट ।
इहीसे आघे मुक्त कमलरीनहे निःशुल्क उच्च शिक्षा, निःशुल्क प्राविधिक शिक्षा, छात्रवृति, होस्टेलमे बैठके अध्ययनरतके लाग स्वास्थ्य चेकजाँच, परिचयपत्रके उपलब्धता, अनुदान सहितके सीप विकासके तालिम लगायतके माग सहित मुख्यमन्त्री भट्टहे ज्ञापनपत्र बुझाइल रहे ।
