कटैनी पुल निर्माणमे ढिलाई
पहुरा समाचारदाता
धनगढी, ६ सावन । बाढसे भत्काइल कटैनीके काठे पुल निर्माणमे ढिलाई हुइल बा । कैलारी गाउँपालिका–७, रामपुरस्थित कटैनी लडियाके काठे पुल बाढसे भस्काइल महिनौं हुइलेसे फेन पुल निर्माणमे ढिलाई होके आभिनसम सञ्चालनमे आइ सेकल नैहो ।
बाढसे महत्वपूर्ण कृषि सडकके काठे पुल भत्काइलपाछे स्थानीयवासीहे ओहोरदोहोर कैना समस्या हुइल बा । पुल बाढसे भत्काके पुहाइलपाछे भुईयाँफाँटा, रामपुर, तिघरी गाउँके किसान जोखिम मोलके ओहोरदोहोर कैना बाध्य हुइल बाटै ।
गैल असार ९ गते आइल बाढसे उ पुल भत्काइल हो । खेतीपातीके समयमे पुल बिग्रलपाछे स्थानीयहे ओहोरदोहोर कैना समस्या हुइल बा ।
बाढसे काठे पुल भत्काइलपाछे जोखिम मोलके खेट्वामे जैना बाध्य रहल रामपुर गाउँके स्थानीय तथा गाउँक भलमन्सा रामलाल चौधरी बटैलै । ओहकान अनुसार ओहोरदोहोरके लाग रामपुर, भुईयाँफाँटा, तिघरीके स्थानीय मिलके बनाइल काठे पुल भत्कलपाछे उ तीन गाउँवासीहे सबसे ढिउर समस्या झेले परल बा ।
पुल भत्कलपाछे स्थानीयहुक्रे ट्रयाक्टर, डल्लप लगायतके कृषि साधन लेके खेट्वासम अइना जैनाके लाग वडा नम्बर ५ स्थित पवेरा मन्दी हुइटी तीन÷चार घण्टाके यात्रा करे परल बा ।
पुल भत्कल महिनौं दिन हुइलेसे फेन मर्मत सम्भारमे स्थानीय सरकार चासो नैडेखाइबर भलमन्सा चौधरी दुखेसो पोख्ले बाटै ।
‘पुल बिग्रल महिनौं होसेकल बा, गाउँ गाउँमे आइल सरकारके महसुस हुइल नैहो, बेगारीसे किल पुल बन्ना अवस्था फेन नैहो’, उहाँ कहलै–‘रकम नैहोके पुल मर्मत कैनो ढिउर समस्या हुइल बा, गाउँपालिकासे रकम विनियोजन करल बात सुनगैल बा, मने विनियोजित रकम कब ओ कैसिक निकासा हुइना बारे कौनो जानकारी नैहोे ।’
पुल मर्मतके लाग अब्बे रामपुर ओ भुँइयाँफाँटाके स्थानीय जनश्रमदानमे जुटल बाटै । लडियामे रहल पुलके कठ्वा निकारक लाग प्रयोग हुइल जेसिबीहे रामपुर ओ भुँइयाँफाँटा गाउँके कोषसे रकम डेहल भलमन्सा भलमन्सा चौधरी बटैलै ।
पुल भत्काइलपाछे यहाँका स्थानीयहे ढिउर समस्या हुइल वडा नम्बर ७ के वडा अध्यक्ष दीपेन्द्र बम बटैलै ।‘भुईयाफाँटा, रामपुर, तिघरीके खेट्वामे जैना मुख्य कृषि सडकके पुल हो उ’, उहाँ कहलै । ‘बाढसे पुल पुहाइलपाछे जनताहुक्रे आपन खेट्वामे जैना पवेराके डगरा नेंगना बाध्य बाटै ।’
लडियामे पक्कीपुल निर्माणके लाग डिपीआर तयार हुइल जानकारी करैटी अध्यक्ष बम पुल समयमे निर्माण सम्पन्नके लाग पहल फेन कैटी रहल बटै । साथे उहाँ काठे पुल मर्मतके लाग गाउँपालिकासे डेढ लाख रकम समेत विनियोजन हुइल बटैलै ।
कुछ दिन आघे उहे वडाके छटकपुर बसन्तास्थित कटैनी लडियाके काठे पुलहे बाढ पुहैले रहे ।
