सुुदूरपश्चिम प्रदेशमे कोरोनाके सक्रिय संक्रमित ४२ जाने
पहुुरा समाचारदाता
धनगढी, ६ सावन । सुदूरपश्चिम प्रदेशमे कोभिड–१९ के सक्रिय संक्रमित संख्या ४२ जाने पुगल बटै ।
सामाजिक विकास मन्त्रालय स्वास्थ्य निर्देशनालय डोटीसे डेहल जानकारी अनुसार यी प्रदेशमे कोरोना संक्रमण फेरसे बह्रे लागल जानकारी डेले बा । निर्देशनालयसे डेहल जानकारी अनुसार शुकके रोज आरटी पीसिआर विधिसे २६ जानेक परिक्षण करेबेर ४ जनहनमे ओ एन्टीजेन विधिसे ३२१ जाने परिक्षण करेबेर ५ करके ९ जाने लौव संक्रमित ठपल बटै ।
यी प्रदेशके कैलालीमे १२ जाने आरटी पीसिआरके सक्रिय संक्रमित बटै कलेसे और जिल्लामे नइडेखल हो । मने एन्टीजेन विधिसे करल परिक्षणमे भर ३२ जाने सक्रिय संक्रमित बटै । जेम्ने कैलालीके १४, कञ्चनपुरके १६ ओ दार्चुला ओ बैतडीके एक/एक जाने रहल निर्देशनालय जनैले बा ।
हालसम यी प्रदेशमे ५ लाख ५५ हजार ७४५ जानेक आरटी पीसिआर ओ एन्टीजेन विधिसे परिक्षण करेबेर ५९ हजार ७८२ जनहनमे संक्रमण डेखल रहे । कलेसे सुदूरपश्चिम प्रदेशमे कोरोना संक्रमण ६३३ जानेक ज्यान जासेकल निर्देशनालय जनैले बा ।
ओस्टेक पछिल्का २४ घण्टामे देशभर थप ४५६ जनहनमे कोरोनाभाइरसके संक्रमण पुष्टि हुइल बा । ३ हजार ८३८ के नमुना परीक्षण करल मन्से आरटी पिसिआर विधिसे ३८४ ओ एन्टीजेन विधिसे ७२ जनहनमे कोरोनाके संक्रमण पुष्टि हुइल स्वास्थ्य तथा जनसंख्या मन्त्रालय जानकारी डेहल हो ।
यी संगे कोरोनाके सक्रिय संक्रमितके संख्या २ हजार ८४१ पुगल बा । पछिल्का २४ घण्टामे ८० जाने अस्पतालसे डिस्चार्ज हुइल बटै ।
