खाद्य प्रविधि तथा गुण नियन्त्रणके वार्षिक समीक्षा
पहुरा समाचारदाता
धनगढी, ६ सावन । खाद्य प्रविधि तथा गुण नियन्त्रण कार्यालय कैलाली आर्थिक वर्ष २०७८/०७९ वार्षिक समीक्षा करले बा । शुकके रोज धनगढीमे समीक्ष कार्यक्रम हुइल हो ।
कार्यालय आर्थिक वर्ष २०७८/०७९ मे खाद्य तथा दाना ऐन अनुरुप संकलन करल नमुनामध्ये ३६ ठो नमुनाहे कारवाही प्रक्रिया आघे बह्राइल जानकारी डेले बा । कार्यालयके प्रमुख नवराज दाहालके अनुसार खाद्य ऐन प्रतिकुल कार्य करना विरुद्ध २७ ठो मुद्दा जिल्ला प्रशासन कार्यालयमे दायर हुइल बा ।
मुद्दा दायर हुइल कैलालीके टमान स्थानीय तहके पसल तथा उद्योग रहल बा । चाउमिनसे लेके पाउरोटी उद्योग रहल बा । ‘ढेर जैसिन दैनिक जीवनसंग रहल खाद्य बस्तु कारवाहीमे परल बा’, कार्यालय प्रमुख दाहाल कलैं, ‘३६ नमुनामध्ये २७ ठो मुद्दा जिल्ला प्रशासनमे दायर हुइल बा ।’
कार्यालय एक वर्षमे १ सय ३२ ठो उद्योग ओ ४ दाना उद्योगहे सिफारिस करले बा । कार्यालयसे सार्वजनिक करल तथ्यांक अनुसार एक वर्षमे कैलालीमे ७५ ठो नयाँ उद्योग ओ एक दाना उद्योगहे अनुज्ञापत्र जारी कैके नविकरण करल डेखाइल बा । कार्यालय प्रमुख दाहाल उद्योगके स्थलगत अनुगमन कैके स्वच्छता मापदण्ड पुरा करल ओ उद्योगसे उत्पादित खाद्य तथा दानाहे प्रयोगशालामे परीक्षण कैके गुणस्तर समेत चकजाँच करना मेरिक वार्षिक प्रतिवेदनमे उल्लेख करल बा ।
एक वर्षमे होटल, रेष्टुरेण्टमे तयारी पारल खाद्य पदार्थके स्वच्छता ओ गुणस्तर नियमनओर संयुक्त बजार अनुगमनसे १२ चो, खाद्य निरीक्षकमार्फत ६० चो बजार अनुगमन करल जनाइल बा । ओस्टेक, २४ चो होटलमे हनुगमन करले बा । तथ्यांक अनुसार ४ सय ३९ ठो खाद्य तथा दाना उद्योगके अनुगमन कार्य करले बा ।
एक वर्षमे खाद्य तथा दाना अनुज्ञापत्र जारी तथा नविकरणके लाग संकलन एक हजार ४२ आइल बटैं । टमान अनुरोध होके आइल ५१, ऐन बमोजिम निरीक्षक संकलित ५ सय ६९, अनुसन्धानात्मक १ सय ५९ कैके एक हजार ८ सय २३ ठो नमुना आइल सार्वजनिक करल तथ्यांकमे उल्लेख करल बा ।
ओस्टेके, एक वर्षमे प्रशोधित पिना पानी उद्योग व्यवसायीहे २ चो ओ दुग्ध उदोगसंग २ चो कैके जम्मा ४ चो गुणस्तर सुधारके लाग अन्तरक्रिया हुइल बा ।
तरकारी तथा फलफूल विषादी अवशेषके ५ हजार ८० नमुनाके विश्लेषण करल बा । कार्यालय प्रमुख नवराज दाहालके अनुसार एक वर्षमे दशैं–तिहारलगायतके चाडपर्वमे खाद्य वस्तु स्वच्छताके उपभोक्ताहे सूचाना करल जनाइल बा ।
कार्यालय एक वर्षमे २७ लाख ९० हजार एक सय ७० रुपैयाँ राजस्व समेत संकलन करले बा । प्रयोगशालामे प्राप्त नमुना विश्लेषण दस्तर वाफत संकलन करल राजस्व रहल कार्यालय जनैले बा ।
ओस्टेके, असार २९ गते प्रशोधित पानीके बोतलमे माकरा रहल समाचार टमान सञ्चारमाध्याममे प्रकाशित हुइलपाछे अनुगमन कैके आवश्यक कारवाही करल कार्यालय जनैले बा ।
कैलालीके बर्दगोरिया गाउँपलिका वडा नम्बर २ मे रहल आकाशगंगा वाटर एण्ड वेभेरेज एन्डस्ट्रिजहे अनुगमनके क्रममे सुधार करना निर्देशन समेत डेहले रहे । सुधारके लाग डेहल निर्देशन पुरा करलपाछे बिफेसे उद्योगमे लगाइल शिलबन्दी फुकुवा कैके कानुन बमोजिम उत्पादन तथा विक्री वितण करना अनुमति डेहल जनाइल बा ।
