बनुवा ओ बन्यजन्तु जोगैना चोरी शिकारी नियन्त्रण दलके भारी योगदानः गापा अध्यक्ष राजसमझ

पहुरा समाचारदाता
हसुलिया,१० सावन । कैलारी गाउँपालिकाके अध्यक्ष राजसमझ चौधरी बनुवा, बन्यजन्तु जोगैनामे चोरी शिकारी नियन्त्रण दलके भारी योगदान रहल बटैले बटै ।

बसन्ता बन क्षेत्र सामुदायिक वन उपभोक्ता समुह समन्वय समिति हसुलियाके आयोजनामे मंगरके रोज चोरी शिकारी नियन्त्रण दलके सदस्यहुकन ट्रयाकसुट ओ जुत्ता वितरण कार्यक्रममे उहाँ उ बाट बटवाइल रहिट ।
बनुवा नाश हुइटी बा, जंगली जिव जनावर लोप हुइटी बटै,’ गाउँपालिका अध्यक्ष राजसमझ कहलै, ‘ओइनहे जोगैना चोरी शिकारी नियन्त्रण दलके भारी योगदान बा । यम्ने सक्कु जानेक सहयोग समन्वय आवश्यक बा ।’
यहाँ छाडा चौपायाकेफे भारी समस्या बा । छाडा चोपाया किसानहुकनके वालीनाली नोक्सान करटी रहल ओरसे ओकर व्यवस्थापनके लाग पालिका लागल उहाँ बटैलै ।

कार्यक्रममे कैलारी गाउँपालिका वडा नम्बर ४ के अध्यक्ष ठागुराम चौधरी वनुवा ओ जंगली जिवजनावर संरक्षणमे चुनौती रहल बटैलै । चोरी शिकारी नियन्त्रण दलके सदस्यहुक्रन वन संरक्षणमे लग्ना ओ अइना समस्याहे गाउँपालिका सहयोग कैना बटैलै ।
बसन्ता बन क्षेत्र सामुदायिक वन उपभोक्ता समुह समन्वय समितिके सल्लाहकार भरतराम चौधरी चोरी शिकारी नियन्त्रण दलके सदस्यहुकन अपन काम कर्तव्य पुरा कैना आग्रह करलै । उहाँ बन हेरालुहुकनहेफे प्रोत्साहित कैना जरुरी रहल बटैलै ।
कार्यक्रममे चोरी शिकारी नियन्त्रण दलके सदस्य भुलुराम चौधरी अपनेहुक्रे गरमी, बर्खा, जार नइकहिके काम करटी रहल बटैलै । उहाँ लाठी, साइकल, टर्चके व्यवस्था करडेना आग्रह करलै ।

बसन्ता बन क्षेत्र सामुदायिक वन उपभोक्ता समुह समन्वय समितिके लेखा समिति संयोजक मनिप्रसाद चौधरी वन ओ बन्य जन्तु जोगाइक लाग सक्कु क्षेत्र समन्वय कैना आवश्यक रहल बटैलै । कार्यक्रम बसन्ता बन क्षेत्र सामुदायिक वन उपभोक्ता समुह समन्वय समिति हसुलियाके अध्यक्ष रमेश चौधरीके अध्यक्षतामे हुइल रहे ।

कैलारी गाउँपालिका वडा नम्बर १,३,४,५ ओ ७ के १९ जाने चोरी शिकारी नियन्त्रण दलके सदस्यहुकन ट्रयाकसुट ओ जुत्ता वितरण करल बा । उ सामाग्री खरिदके लाग कैलारी गाउँपालिकासे आर्थिक सहयोग कैगिल रहे ।