कैलारीके ३ ठो वडामे ६० ठो स्यालो ट्यूवेल जडान कैना

पहुरा समाचारदाता
हसुलिया, १० सावन । कैलारी गाउँपालिकाके तीन ठो वडामे ६० ठो स्यालो ट्यूवेल जडान कैना जनागिल बा ।

संयुक्त राष्ट्र संघीय खाद्य तथा कृषि संगठन नेपालके आर्थिक सहयोगमे कैलारी गाउँपालिकाके तीन ठो वडामे स्यालो ट्यूवेल जडान कैना जनागिल हो ।

गाउँपालिका अध्यक्ष राजसमझ चौधरीके अध्यक्षतामे संयुक्त राष्ट्र संघीय खाद्य तथा कृषि संगठन नेपाल विच मंगरके रोज हुइल छलफल कार्यक्रममे कैलारीके वडा नम्बर ४ मे १५ ठो, वडा नम्बर ६ मे १५ ओ वडा नम्बर ७ मे ३० ठो स्यालो ट्यूवेल जडानके लाग संयुक्त राष्ट्र संघीय खाद्य तथा कृषि संगठन नेपालसे सहयोग कैना महेन्द्र यादव जानकारी डेलै । छोट किसानहे लक्षित करके जडान कैना एक स्यालो ट्यूवेलसे तीन घरपरिवार लाभान्वित हुइना जनागिल बा ।

ओस्टेक उहाँ १४ सय घरपरिवारहे टिना खेतीके लाग विउके लाग सहयोग जनैलै । छललफ कार्यक्रममे गाउँपालिका उपाध्यक्ष भगवतीकुमारी चौधरी, वडा नम्बर ४ के अध्यक्ष ठागुराम चौधरी, वडा नम्बर ६ के अध्यक्ष प्रेमबहादुर चौधरी, वडा नम्बर ७ के अध्यक्ष दिपेन्द्रबहादुर बम, सामाजिक विकास अधिकृत यगम कलेल, कृषि शाखा प्रमुख मैयाकुमारी चौधरी, इन्जिनियर भरत चन्द लगायतके उपस्थिति रहल रहे ।