सुदूरपश्चिम १४ जनहने ठप कोरोना संक्रमण

पहुरा समाचारदाता
धनगढी, ११ सावन । सुदूरपश्चिम प्रदेशमे थप १४ जनहनमे कोरोना भाइरसके संक्रमण पुष्टि हुइल बा । स्वास्थ्य निर्देशनालयसे सार्वजनिक करल तथ्यांकअनुसार सेती प्रादेशिक अस्पताल ओ कञ्चनपुरके सीमा नाकामे परीक्षण करेबेर १४ जनहनमे संक्रमण भेटल हो ।

निर्देशनालयके अनुसार कञ्चनपुर ओ कैलालीके सीमा नाकामे २९८ जानेक एन्टिजेन परीक्षण करेबेर ४ जनहनमे ओ सेतीमे २५ नमूनाके पीसीआर परीक्षण करेबेर १० जनहनमे संक्रमण फेला परल हो । सुदूरपश्चिम प्रदेशमे ७१ जाने सक्रिय संक्रमित रहल बटै ।

ओस्टेक करके पछिल्का २४ घण्टामे ५६४ जनहनमे कोरोना संक्रमण पुष्टि हुइल बा । स्वास्थ्य तथा जनसंख्या मन्त्रालयके अनुसार चार हजार ४५४ जनहनमे करल परीक्षणमे ५४६ जनहनमे संक्रमण पुष्टि हुइल हो ।

दुई हजार ७७८ पीसीआर परीक्षणमे ४१८ ओ एक हजार ६७६ एन्टिजेन परीक्षणमे १४६ जनहनमे संक्रमण डेखल हो । पछिल्का २४ घण्टामे कोरोना संक्रमणमुक्त हुइना संख्या २०२ रहल बा । ओस्टेक कोरोना संक्रमणके कारण पछिल्का २४ घण्टामे एकजनहनके मृत्यु हुइल बा । हाल नेपालमे कोरोना भाइरसके सक्रिय संक्रमितके संख्या तीन हजार ९२९ पुगल बा ।

नाकासे प्रभावकारी ढंगसे स्वास्थ्य चेकजाँच कैना

कोभिड–१९ के संक्रमण बह्रटी गैल ओरसे जिल्ला संकट व्यवस्थापन केन्द्र जिल्लावासीहुकनहे सतर्क अपनैना आग्रह करले बा ।

प्रमुख जिल्ला अधिकारी किरण थापाके अध्यक्षतामे बुधके रोज धनगढीमे बैठल जिल्ला संकट व्यवस्थापन केन्द्र (डिसिसिएमसी)के बैठकसे जिल्लावासीहुकनहे कोरोनासे सतर्क अपनैना आग्रह करल हो ।

डिसिसिएमसीके बैठकसे कोभिड–१९ के संक्रमण बह्रटी गैल ओरसे जिल्लावासीहुकनके सतर्क रहेक लाग जनस्वास्थ्यके मापदण्ड पालना कैना ओ खोप÷बुष्टर खोप लगैना अनुरोध करले बा । कोरोना संक्रमण फेरसे फैल्टी रहल अवस्थाहे मध्य नजर करटी त्रिनगर नाका, टीकापुर नाकासे प्रवेश कैना नेपालीहुकनके थप प्रभावकारी ढंगसे स्वास्थ्य परिक्षण तथा चेकजाँक कैना जनागिल बा ।

स्वास्थ्य परिक्षण तथा चेकजाँके लाग आवश्यक पर्ना जनशक्ति ओ स्रोत साधानके लाग जिल्ला स्वास्थ्य कार्यालयहे अनुरोध कैना, सचेतनामुलक सार्वजनिक सन्देश प्रचार प्रसार कैना नेपाल रेडक्रस लगायत अन्य संघसंस्थाहे आग्रह कैना कहल बा ।

जिल्ला संकट व्यवस्थापन केन्द्रके बैठकमे प्रमुख जिल्ला अधिकारी किरण थापा, सेती प्रादेशिक अस्पताल कैलालीके मे.सु. डा. शेरवहादुर कमर, जिल्ला समन्वय समितिको कार्यालयके अधिकृत धर्मराज विनाडी, नेपाली सेना देवी दल गणके ग. प्र. सेनानी, सुनिल कुमार मल्ल, जिल्ला प्रहरी कार्यालय, कैलालीके प्रहरी उपरीक्षक सोमेन्द्र सिंह राठोर, सशस्त्र प्रहरी बल नेपाल नं. ३४ गणके सशस्त्र प्रहरी उपरीक्षक धनवहादुर सिंह, राष्ट्रिय अनुसन्धान जिल्ला कार्यालयके उप–अ.नि. रमेशसिंह डांगा, जिल्ला स्वास्थ्य कार्यालय कैलालीके निमित्त कार्यालय प्रमुख, लालवहादुर धामी, नेपाल रेडक्रस सोसाईटी कैलालीके मन्त्री लोकराज जोशी, जिल्ला प्रशासन कार्यालय कैलालीके प्रशासकीय अधिकृत शिवराज जोशी लगायतके उपस्थिति रहल रहे ।