राप्रपा बल्गर हुइले केल देश बल्गर हुईः लिङदेन

पहुरा समाचारदाता
धनगढी, ११ सावन । राष्ट्रिय प्रजातन्त्र पार्टीके अध्यक्ष राजेन्द्र लिङदेन राप्रपा बल्गर हुइलेसे केल देश बल्गर हुइना बटैले बटै । उहाँ राप्रपा केल देश बचैना पार्टी हुइल ओरसे राप्रपाप्रति सक्कुके आकर्षण बह्रटी गैल दाबी करलै ।

धनगढीमे बुधके आयोजित पार्टी प्रवेश कार्यक्रममे अध्यक्ष लिङदेन कहलै, ‘अब राप्रपा देशके वैकल्पिक राजनितिक शक्तिके रुपमे आघे बढसेकल बा, कोई चाहकेफे रोके नइसेकी ।’

राप्रपा देश बचैना, धर्म बचैना पार्टी हुइल ओरसे यि प्रति युवासे जेष्ठ नागरिकसमके आकर्षण बढल उहाँ बटैलै । उहाँ कहलै, ‘हम्रे संघीयता, धर्म निरपेक्षता ओृ गणतन्त्र खारेज कैना करके आघे बढल बा, यम्ने सक्कुहुनके साथ–सहयोग आवश्यक बा ।’

अध्यक्ष लिङदेन वैशाखमे सम्पन्न स्थानीय तहके निर्वाचनमे राप्रपा परिणाम डेखाई नइसेक्लेफे शक्तिके रूपमे आघे बढल सन्देश डेहल बटैलै । उहाँ कहलै, ‘स्थानीय तहके निर्वाचनमे भाग लेहेबेर राप्रपाके संरचना भताभुंग रहे, अब संगठन विस्तार करके अइना निर्वाचनमे परिणाम डेखाई परठ ।’

राप्रपा देश बचैना ओ बनैना पार्टी हुइल ओरसे यम्ने प्रवेश करल कौनोफे नेता तथा कार्यकर्ता पछटाई नइपैना अध्यक्ष लिङदेनके कहाई बा । टमान पार्टी परित्याग करके राप्रपामे प्रवेश पार्टी प्रवेश कार्यक्रममे कांग्रेस, एमाले, माओवादी, समाजवादीलगायतसे ६ सय जाने राप्रपामे प्रवेश करल राष्ट्रिय प्रजातन्त्र पार्टी जिल्ला कार्यसमिति कैलाली जनैलै बा ।

तत्कालीन नेकपा प्रदेश कमिटी सदस्य एवं उद्योग विभाग प्रमुख राजेश भण्डारीके नेतृत्वमे भारी संख्यामे नेता तथा कार्यकर्ता राप्रपामे प्रवेश करल हुइट ।

पार्टी प्रवेश कार्यक्रममे राजेश भण्डारी देश बचैना नेतृत्व ओ पार्टी राप्रपा केल रहल ओरसे राप्रपामे प्रवेश करल बटैलै । उहाँ कहलै, ‘नेपालहे हिन्दू राष्ट्र कायम करैनाफे राप्रपा केल सेकी, आब मै फै यी पार्टीमे रहिके निर्णयक आन्दोलन ओ अभियानमे सक्रियतापूर्वक लागम ।