भागिराम ३० औं प्रयासमे पास करलै एसईई

पहुरा समाचारदाता
धनगढी, १२ सावन । निरन्तरके मेहनत ओ दृढ आत्मविश्वाससे सफलता निश्चित हुइठ् । इ कथनके उदाहरण बनल बाटै कैलालीके कैलारी गाउँपालिका ६ बनकट्टाके ५३ वर्षीय भागीराम चौधरी । २९औं चोसम एसएलसी तथा एसईईमे अनुत्तीर्ण हुइल उहाँ अन्ततः ३०औंचोके प्रयासमे सफलता हासिल करले बाटै ।

राष्ट्रिय परीक्षा बोर्ड परीक्षा नियन्त्रण कार्यालयसे बुधके सार्वजनिक करल माध्यमिक शिक्षा परीक्षा (एसईई) के नतिजा अनुसार उहाँ २.५ जीपीए लानके पास हुइल हुइट । एसईईमे उत्तीर्ण हुइलपाछे उहाँ आपन अध्ययनरत तथा कार्यरतसमेत रहल विद्यालयमे मिठाई बाँटके खुसी सटले बाटै । उहाँ कैलारी गाउँपालिका–९ गदरियास्थित जनता माध्यमिक विद्यालयके कार्यालय सहयोगी हुइट । उहाँ उहे विद्यालयमे अध्ययनरत बाटै ।

२०४८ से एसएलसी परीक्षा डेटी आइल उहाँ कोरोना महामारीके अवधिमे भर परीक्षामे सहभागी नैहुइल रहिट । शिक्षा प्राप्तिके बहुट लम्मा संघर्ष ओ दृढ आत्मविश्वासपाछे एसईई उत्तीर्ण हुइल उहाँ आपन कार्यरत रहल विद्यालयमे कक्षा ११ मे भर्ना हुइना येजना रहल बटैलै । शिक्षाप्रति ओहकानमे रहल लगाव नै सबके लाग उत्प्रेरणाके स्रोत बन्ना ओहकान सहकर्मी बटैठै ।

ओस्टके जनता माध्यमिक विद्यालयमे कार्यरत शिक्षक डिल्लीराम मिश्र फेन जीवनमे हरेश नैखाके निरन्तर मेहनत कैलेसे सफलता निश्चित रहल कना उदाहरण भागीराम बन्ना सफल हुइलमे हर्ष व्यक्त करलै । ३ लर्कक बाबा ओहकान बर्का छावा स्नाकोत्तर अध्ययनरत बाटै, कलेसे औरे छावा ओ छाइ स्नातकमे अध्ययनरत रहल बाटै ।