सुदूरपश्चिम पूर्ण खोपयूक्त प्रदेश घोषणाके तयारीमे
पहुरा समाचारदाता
धनगढी, १२ सावन । सुदूरपश्चिम पूर्ण खोपयूक्त प्रदेश घोषणाके तयारीमे रहल बा । प्रदेश स्वास्थ्य निर्देशनालयसे विफेक रोज खोप सम्बन्धी जानकारी डेटी सुदूरपश्चिम प्रदेशहे कुवाँर महिनाभिटरे पूर्ण खोपयूक्त प्रदेश घोषणाके तयारीमे रहल वरिष्ठ जनस्वास्थ्य अधिकृत दयाकृष्ण पन्त बटैलै । सुदूरपश्चिम प्रदेश नौ जिल्ला मन्से आठ जिल्ला पूर्ण खोपयूक्त जिल्ला घोषणा हुसेकल मने बाजुरा जिल्ला केल पूर्ण खोपयूक्त घोषणा हुइना बाँकी रहल उहाँ बटैलै ।
बाजुराहे पूर्ण खोपयूक्त जिल्ला घोषणाके लाग तयारीमे रहल ओरसे सावन–भदौमे यी जिल्ला पूर्ण खोपयूक्त हुइटी किल कुवाँरमे प्रदेशहेफे पूर्ण खोपयूक्त घोषणा कैना प्रदेश स्वास्थ्य निर्देशनालयके वरिष्ठ जनस्वास्थ्य अधिकृत पन्त बटैलै ।
सात प्रदेश मन्से अभिनसम गण्डकी प्रदेश केल पूर्ण खोपयूक्त घोषणा हुइल बा, उहाँ कहलै, ‘सुदूरपश्चिम प्रदेशहे गैल बरस पूर्ण खोपयूक्त घोषणा कैना तयारीमे रही । कोरोना महामारीके कारण पाछे हुइल हो । बाजुरामे सावन महिनाभिटरे पूर्ण खोपयूक्त हुइटी किल प्रदेशहेफे पूर्ण खोपयूक्त घोषणा करब ।’
सुदूरपश्चिम प्रदेशके अछाम जिल्लामे यिहे असार ३२ गते, बैतडीहे असार ६ गते, कञ्चनपुरहे असार २८ गते, डडेल्धुराहे २६ गते, बझाङहे २८ गते, दार्चुलाहे असार २४ गते, कैलालीहे असार ३१ गते ओ डोटीहे असार २७ गते पूर्ण खोपयूक्त जिल्ला घोषणा हुइल प्रदेश स्वास्थ्य निर्देशनालय जनैले बा । ओस्टेक बाजुरा जिल्लाहे सावन महिनाभिटरे पूर्ण खोपयूक्त जिल्ला घोषणाके तयारीमे जुटल प्रदेश स्वास्थ्य निर्देशनालयके वरिष्ठ जनस्वास्थ्य अधिकृत पन्त बटैलै । और देशमे ४० मेरिक खोप लगैना करल मने नेपालमे भर १३ ठो सरुवा रोगके खोप लगैटी आइल बा । यहाँ क्षयरोग, रोटा भाइरससे करैना झाडापखाला, पोलियोमाइलाईटिस, भ्यागुतेरोग, लहरेखोकी, धनुष्टंकार, हेपाटाइटिस बी, निमोनिया, मेनिन्जाइटिस, जापनिक इन्सेफलाइटिस, दादुरा, रुबेला ओ टाइफाइड विरुद्धके खोप लगाजैटी रहल बा ।
खोप सेवा मासिक देशभरके १६ हजारसे ढेर खोप केन्द्रसे ओ १७ हजारसे ढेर खोप सेसनके साथे नीजि ओ गैरसरकारी स्वास्थ्य संस्थासे प्रदान करजैटी आइल निर्देशनालय जनैले बा । सुदूरपश्चिम प्रदेशमे १७ सय ढेर खोप केन्द्र, १८ सय ढेर खोप सेसन संस्थागत स्वास्थ्य संस्था तथा बाहय खोप केन्द्र मार्फत संचालन रहल बा । सुदूरपश्चिम प्रदेशमे अभिनफे २२ प्रतिशत बालबालिका पूर्ण खोप नइपाइल प्रदेश स्वास्थ्य निर्देशनालयके वरिष्ठ जनस्वास्थ्य अधिकृत पन्त बटैलै ।
बुष्टर खोप ३३ प्रतिशत केल लगैलै
कोरोना भाइरसके संक्रमण फेरसे बह्रे लागल मने तीन चरणके खोप पूर्णरुपमे अभिनसम सक्कु जाने नइलगाइल प्रदेश स्वास्थ्य निर्देशनालय जनैले बा ।
रोगसे लरेक लाग खोप सुरक्षित बा, निशुल्क बा मने तीनु चरणके खोप अभिनसम ढेर मनै नइलागाइल प्रदेश स्वास्थ्य निर्देशनालयके वरिष्ठ जनस्वास्थ्य अधिकृत दयाकृष्ण पन्त बटैलै । सुदूरपश्चिम प्रदेशमे पहिल चरणके खोप ८३ प्रतिशत केल लगैले बटै । दुसरा चरणके डोज ७९ प्रतिशत ओ सबसे कम ३३ प्रतिशत केल बुष्टर खोप लगाइल उहाँ बटैलै । पाँचसे ११ बरसके बालबालिकामे पहिल चरणके खोप लगाइल ओरसे बुष्टर खोप कम डेखल हो । मने कोरोनासे बँच्ना उपाय तीन चरणके खोप अनिवार्य रहल अधिकृत पन्त बटैलै । जोनसोन लगाइल व्यक्तिफे तीन चरणमे खोप लगैही पर्ना उहाँक सुझाव बा ।
कोरोना भाइरस विरुद्धके तीन चरणके खोपके अवस्था हेरेबेर कैलालीमे पहिल खोप ८६ प्रतिशत, दुसरा खोप ७९ प्रतिशत, बुष्टर खोप ३६ प्रतिशत केल लगैले बटै । कञ्चनपुरमे पहिल खोप ९१ प्रतिशत, दुसरा खोप ८७ प्रतिशत ओ बुष्टर खोप लगैना संख्या जम्मा ३२ प्रतिशत रहल बा ।
अछाममे पहिल खोप ५९ प्रतिशत, दुसरा खोप ६५ प्रतिशत ओ बुष्टर खोप ३१ प्रतिशत रहल बा । डोटीमे पहिल खोप ७१ प्रतिशत, दुसरा खोप ७८ प्रतिशत, बुष्टर खोप ३१ प्रतिशत केल लगैले बटै ।
डडेल्धुरामे पहिल खोप ८२ प्रतिशत, दुसरा खोप ८४ प्रतिशत ओ बुष्टर खोप ३६ प्रतिशत केल लगैले बटै । बैतडीमे पहिल खोप ८५ प्रतिशत, दुसरा खोप ८६ प्रतिशत ओ बुष्टर खोप ४६ प्रतिशत केल लगैले बटै ।
दार्चुला जिल्लामे पहिल खोप ८२ प्रतिशत, दुसरा खोप ८६ प्रतिशत ओ बुष्टर खोप ३० प्रतिशत केल लगैले बटै । बझाङमे पहिल खोप ६५ प्रतिशत, दुसरा खोप ६३ प्रतिशत ओ बुष्टर खोप १५ प्रतिशत केल लगैले बटै । ओस्टेक बाजुरा जिल्लामे पहिल खोप १०८ प्रतिशत, दुसरा खोप ८६ ओ बुष्टर खोप २२ प्रतिशत केल लगाइल स्वास्थ्य निर्देशनालय जनैले बा ।
प्रदेश स्वास्थ्य निर्देशनालयके निर्देशक डा. जगदीश जोशी कोरोनासे बाँचेक लाग खोप आवश्यक रहल लापारवाही नइकरके अनिवार्य लगैना आग्रक करलै । उहाँ कहलै, ‘१३ मेरिक खोपसे टमान महामारीके निर्मुल हुइल बा । कोरोना विरुद्धके तिनु चरणके खोप पूर्णरुपमे लगैले रोगहे प्रतिकार करेसेक्जाई ।’
सुदूरपश्चिममे ठप १८ जहनमे कोरोना संक्रमण
सुदूरपश्चिम प्रदेशके पछिल्का २४ घण्टामे १८ जाने कोरोना संक्रमित ठपल बटै । प्रदेश स्वास्थ्य निर्देशनालयसे डेहल जानकारी अनुसार ३५१ जानेक एन्टीजेन परिक्षण करेबेर ९ ओ २३ जानेक आरटी पीसिआर जाँच करेबेर ९ करके १८ जनहनमे संक्रमण हुइल हो ।
ओस्टेक करके पछिल्का २४ घण्टामे थप ७१० जनहनमे कोरोना भाइरस (कोभिड–१९) के संक्रमण पुष्टि हुइल बा कलेसे दुई जानेक मृत्यु हुइल बा ।
यी संगे कोरोना संक्रमणसे मृत्यु हुइलके संख्या ११ हजार ९६२ पुगल बा । स्वास्थ्य तथा जनसंख्या मन्त्रालयके अनुसार देशभर ५ हजार २५ नमुना परीक्षण करेबेर ७१० जाने कोरोना संक्रमण पुष्टि हुइल हो ।
जेम्ने मन्से २ हजार ५४१ जानेक पीसीआर परीक्षण करेबेर ५२४ जाने ओ २ हजार ४८४ जानेक एन्टिजेन परीक्षण करेबेर १८६ जनहनमे संक्रमण डेखल मन्त्रालयके कहाई बा ।
यी संगे कोरोना भाइरसके सक्रिय संक्रमितके संख्या ४ हजार २३६ पुगल बा । जेम्ने मन्से ४ हजार ८० जाने होम आइसोलेसनमे रहल बटै कलेसे १५६ जाने संस्थागत आइसोलेसन ओ ३३ जाने आईसीयूमे बटै ।
ओस्टेक ३ जानेक भेन्टिलेरमे धारके उपचार हुइटी रहल मन्त्रालय जनैले बा । बिफेक रोज थपलसंगे नेपालमे कोरोना संक्रमितके कुल संख्या ११ लाख २७ हजार ५४९ पुगल बा ।
