जनता स्वतन्त्र हुइपरठः नगरप्रमुख हमाल
पहुरा समाचारदाता
धनगढी, १४ सावन । कैलालीके धनगढी उपमहानगरपालिकाके नगरप्रमुख गोपाल हमाल रवि लामिछानेके नेतृत्वमे घोषित राष्ट्रिय स्वतन्त्र पार्टीके सुदूरपश्चिम प्रदेश भेलामे सहभागी हुइल बटैं ।
शनिच्चरके रोन धनगढीमे हुइल भेलामे नगरप्रमुख हमाल देश परिवर्तन करे आइल पुस्ताके जिम्मा लगैना अभियानमे सफलताके लाग कामना करले बटैं । स्वतन्त्र रुपमे उम्मेदवार खडा करना अभियानके रुपमे आघे बह्रेपरना नगरप्रमुख हमालके सुझाव रहे ।
“समस्या नेतामे नैहो,” उहाँ कलैं, “समस्या मतदातामे बा । जबसम मतदाता स्वतन्त्र नैहुइ तबसम सक्कु सम्भावना अधुरा रहि । सबसे पहिले जनता स्वतन्त्र हुइपरल ।”
रवि लामेछानीके नेतृत्वमे गठन हुइल राष्ट्रि सवतन्त्र पार्टी पश्चिम नेपालके जिल्ला दौडामे रहल बा । शनिच्चरके धनगढीमे भेला हुइल रहे कलेसे काल्ह (अँट्वारके रोज) कञ्चनपुरमे कार्यक्रम बा ।
ओस्टेके, कार्यक्रमके सम्बोधन करटि राष्ट्रिय स्वतन्त्र पार्टीके सभापति रवि लामिछाने अर्थ मन्त्रालयमे डिलिट हुइल कहल सिसिटिभी फुटेज रिकभर करे सेक्ना बटैलैं । प्रदेशस्तरीय भेलामे लामिछाने अपने उ सिसिटिभी फुटेज एक घण्टामे रिकभर करना दाबी करलैं ।
“मै चुनौतीके साथ कहटुु, महिन एक घण्टा सिंह दरभार जाके अर्थमन्त्रालयके कम्प्युटरके हार्डडिस्क डेजाए,” उनले भने, ‘कैसिक चाहि रिकभर कैके सर्वसाधारणहे डेखाइ नैसेकम कलेसे कहहो ।”
लामिछाने प्रमुख प्रतिपक्षी एमाले एम अधिकारीसँग सिसिटिभी फुटेज हेराइल विषय साटल आरोप फेन लगैलैं । एमालेके अर्थ तथा योजना विभागके सदस्यमे रहल एम अधिकारी राष्ट्र बैंकके गभर्नर रहल कटि काँग्रेस ओ माओवादी उहाँक राजीनामा मागले रहे । मने, अब्बे यी विषय फेन सराइल बा ।
