धनगढीके नवजीवन अस्पतालमे डायलाइसिस सेवा सुरु

पहुरा समाचारदाता
धनगढी, १७ सावन । सुदूरपश्चिममे पहिल चो नीजि क्षेत्रसे डाइलाईसिस सेवा सुचारु करले बटै ।

धनगढीस्थित नवजीवन अस्पतालमे नीजि क्षेत्रके लगानीमे डायलाइसिस सेवा सञ्चालनमे आइल हो । मार्क इन्टरनेशनल किड्नी सेन्टर ओ नवजीवन अस्पतालके सहयोगमे नवजीवन अस्पतालमे तत्कालके लाग ६ ठो मेसिन जडान करके मंगरसे सेवा सुरु करल बा । डाइलाईसिस सेवा उद्घाटन करटी डाक्टर शुभेसराज कायस्थ पछिल्का समय सुदूरपश्चिममे स्वास्थ्य सेवा विस्तारके क्रमसे क्रान्ति करल बटै ।

अपने सुदूरपश्चिममे आईबेर इसिजी सेवा समेत नइरहल ओ किड्नीके विरामीहे उपचार सेवा डेना ढेर समस्या हुइल स्मरण करटी डाक्टर कायस्त कहलै, ‘अब्बे सरकारीसंगे नीजि क्षेत्रसेफे डाइलाईसिस सेवा सुचारु करले बा ।, और स्वास्थ्य क्षेत्रमेफे ढेर सुधार हुइल बा, यिहीसे विरामीहे ढेर सहजुल बनैले बा ।’ डाक्टर कायस्त पछिल्का समय नइसर्ना रोगके कारण मनैनहे समस्या हुइटी रहल कहटी खानपानमे ध्यान नइडेके यैसिन समस्या हुइटी रहल बटैलै ।

नवजीवन अस्पतालके मेनेजिङ डाइरेक्टर यज्ञराज ढुंगाना धनगढी डाक्टरके हव बने लागल डेखके खुशी लागल बटैलै । मने विरामी अभिनफे सहज सुविधा नइपाइल ओ उपचार सेवा महंगा हुइल गुनासो कैना करल कहटी उहोर ओर डाक्टरसेफे सोचे पर्ना बटैलै । उहाँ करोडौं खर्च करके पह्रल डाक्टरहे सरकारसे उचित पारिश्रमिक नइडेके ओइने प्राइभेट क्षेत्रमे काम करे पर्ना बाध्यता रहल कहटी उहीहे नकारात्मक तरिकासे बुझे नइहुइना बटैलै । ढुंगाना नवजीवन अस्पतालमे सञ्चालन हुइल डाइलाईसिस सेवा विपन्न वर्गसेफे लेके सेक्ना बटैलै ।

‘हम्रे पैसाके लाग केल डाइलाईसिस सेवा सञ्चालन करल नइहुई,’ ढुंगाना कहलै, ‘उपचार नइपाके छटपटाइल नागरिकहेफे लक्षित करले बटी, काठमाण्डौं जाके महंगा उपचार सेवा लेटी रहल विरामीसेफे नवजीवनमे शुलभ सेवा पाजाई ।’ बरिष्ठ रेडियोलोजिस्ट डाक्टर निराजन अर्याल सेतीमे केल डाइलाइसिस सेवा सञ्चालनमे रहलमे सक्कु बिरामीसे उपचार नइपाइल अवस्थामे नवजीवनमे सेवा थपेबेर विरामीहे उपचार कैना सहजुल हुइना बटैलै ।

उहाँ अभिनफे डाइलाईसिसके विरामीके पहिल रोजाई सेती हुइना बटैलै । सुदूरपश्चिममे डाइलाइसिस सेवा लेना ४ सय विरामी रहल कहटी नवजीवनमे सञ्चालन हुइल डाइलाईसिस सेवासेफे सक्कु उपचार पाई नइसेक्ना बटैलै । करिब ७ करोडके लगानीमे १० बेडके डायलाइसिस सेन्टर सञ्चालनमे आइल कार्डियोलोजिस्ट डाक्टर अर्चन शम्सेर राना बटैलै । अब्बे ६ बेडसे सेवा प्रवाह हुइटी रहल ओ बाँकी ४ ठामे मेसिन जडान हुइटी रहल उहाँ बटैलै । कार्यक्रममे नवजीवन अस्पतालके डाइरेक्टर डा. विधुरमण् िढकाल लगायत मन्तव्य व्यक्त करले रहिट ।