नगहर कार्यक्रम हुईल

पहुरा समाचारदाता
मसुरिया, १७ सावन । गौरीगंगा नगरपालिकामे नगहर (सपहेरी) कार्यक्रम हुईल बा । प्रत्येक बरष नाग पञ्चमी, गुरहीके दिन हुईना कार्यक्रम मंगरके रोज भव्यताके साथ सम्पन्न हुईल हो ।

थारु गुरुवा बैदवा सेवा समितिके आयोजनामे हुईल कार्यक्रम समितिके नगर अध्यक्ष गोपाल दास चौधरीके अध्यक्षतामे हुईल कार्यक्रममे गौरीगंगा नगरपालिका वडा नम्बर १० के वडा अध्यक्ष नर सिंह सार्की अपने गुरुवा बैदवाहे अईना दिनमे अपन ओरसे हुइना सहयोग कर्ना बटैले बटै ।

अपने यिहे समाजमे जन्म हुईल ओे यहे समाजमे भिनल ओरसे अपन ठाउसे सहयोग कर्ना बटैलै ।

कार्यक्रममे युनिक नेपाल बर्दियाके अध्यक्ष पिरिम थारु अप्ने गुरुवा बैदवाहे एकदम विस्वास कर्ना बटैलै । युनिक नेपाल फेन गुरुवा सम्वन्धी काम करटी रहल ओ पहिचान करके सक्कु गुरुवा बैदवाहे सम्मेलन करेक पर्ना बटैलै ।

कार्यक्रममे गायक मनिराम चौधरी, यूनिक नेपालके सचिव निर्मला चौधरी, नगर कार्यपालिका सदस्य लक्ष्मी विक लगायतके सहभागिता रहे । कार्यक्रममे स्वागत हिगु राम चौधरी करले रहिट ।