मिस्टर एण्ड मिस थारु २०२२ के आवेदन खुला
१० स्थानमे अडिसन हुइना
पहुरा समाचारदाता
काठमाडौं, १८ सावन । चौथो संस्करणके मिस्टर एण्ड मिस थारु २०२२ के आवेदन खुल्ला हुइल बा । आयोजक जह इन्टरटेनमेन्ट प्रालिसे काठमाडौंमे पत्रकार सम्मेलन कैटी लावा संस्करणके लाग आवेदन खुला करल जनाइल हो ।
प्रतियोगितामे सहभागी हुइ चाहुइया युवायुवती आधिकारिक वेबसाइट रजिस्ट्रेशन डट जहइन्टरटेनमेन्ट डटकममे जाके आवेदन डेहे सेकजैना बा कलेसे खल्ती एपमार्फत फेन आवेदन डेहे सेकजैना जह इन्टरटेनमेन्ट प्रालिके प्रमुख कार्यकारी अधिकृत (सीईओ) सुरेश चौधरी जानकारी डेलै ।
आवेदनके लाग ६०० रुपैयाँ शुल्क तोकल बा । आयोजकके अनुसार अडिसनके मितिसे एक दिन आघेसम फारम भरे सेकजैना बा ।
मिस्टर एण्ड मिस थारुके आवेदन खुल्ला करलसँगे अडिसनके मिति समेत तय करल बा । विगतमे जस्टे इ बेर देशके मुख्य १० सहरमे अडिसन हुइना जनाइल बा । अडिसन इहे सावन २१ गतेसे सुरु हुइना जनाइल बा । पहिल दिन सुनसरीके झुम्का, वीरगञ्ज, भरतपुर ओ बाँकेके नेपालगञ्जमे अडिसन हुइना बा ।
ओस्टके डुसरा अडिसन सावन २४ गते विराटनगर, सिरहाके लहान ओ कैलालीके टीकापुरमे एकसाथ हुइना बा कलेसे टिसरा तथा अन्तिम अडिसन सावन २८ गते काठमाडौं, दाङ ओ बुटवलमे एकसाथ हुइना बा ।
अडिसनसे छनोट हुइलहे भदौमे अभिमुखीकरणमे सहभागी करैना ओ ओकर लगत्ते काठमाडौं बाहर ग्राण्ड फिनाले कैना आयोजकके तयारी रहल बा ।
