शिवरत्नपुरबासीके झोलुङे पुल चिहुरना सपना मोहना लडियामे पुहाइल
पहुरा समाचारदाता
धनगढी,१८ सावन । कैलाली जिल्लाके कैलारी गाउँपालिका–३ खोनपुर ओ शिवरत्नपुर जोरना मोहना लडियामे तीन बर्षसे निर्माणाधिन झोलुङे पुहल बा ।
मोहना लडियामे आइल बाढ बुधके रोज निर्माणाधिन अवस्थामे रहल झोलुङे पुल पुहल गाउँपालिका अध्यक्ष राजसमझ चौधरी बटैलै । झोलुङे पुलके लाग चाहल लटठा नइहुके निर्माण पुरा हुई नइसेकल रहे, उहाँ कहलै, लटठा रहट यिहे साल संचालन हुजाइट मने मोहना लडिया आज पुहाके लैगिल ।
वडा नम्बर ३ के सन्तराम चौधरी मोहनामे यि बरसके सबसे भारी बाढ आइल बटैलै । उहाँ कहलै, आज यहोरके मनै उहोर जाई नइसेक्ना, उहोरके मनै यहोर आइनइसेक्ना अवस्था बा, मोहना लडिया तिब्र कटानी करटा झोलुङे पुलके दक्षिणके पिल्लर लैगिल ।’ करिब निर्माण सम्पन्न हुइल मने लटठा नइहुइल कारण उ झोलुङे पुल संचालनमे आइनइसेकल रहे ।
शिवरत्नपुरके स्थानीय कमल चौधरी अपनेहुकनके पुल चिहुरना सपना लडिया पुहल बटैलै । झोेलुङे पुल निर्माणमे ढिलाई हुइटी गैल रहे । तीन बरससे बन्टी रहल पुल नइबन्के शिवरत्नपुरबासी लाउमे जोखिम मोलके लडिया पार करिट । पुलके दक्षिण पिल्लर पुहल बा । आव पुल चिहुरना आश नइहो कमल कहलै ।
उहाँ कहलै, ‘अभिनसम लाउमे भरमे लडिया आरपार कैना अवस्था बा, बर्षाके बेला विमारीके स्वास्थ्य उपचारसे, सुत्केरी गर्भवतीनहे खोप लगैना ओ विद्यार्थीनहे विद्यालय अइना जइना समस्या बा ।’
मोहना लडियक कटानीसे शिवरन्तपुरके १६ घर विस्थापित हुके टेन्ट टरे बैठना अवस्था आइलफे उहाँ बटैलै ।
