थरुहट मोर्चासे टीकापुर विद्रोह दिवस मनैना

पहुरा समाचारदाता
धनगढी, २१ सावन । थरुहट थारुवान राष्ट्रिय मोर्चासे टीकापुर विद्राह दिवस मनैना हुइल बा ।

मोर्चासे भदौ ७ गते टीकापुर विद्रोह दिवस ओ संविधान जारी हुइल दिन कुँवार ३ गते कालो दिन मनैना हुइल बा । मोर्चाके केन्द्रिय संयोजन समितिके कार्यबाहक संयोजक श्रवण थारुके अध्यक्षतामे शुकके काठमाडौंमे बैठल बैठकसे उक्त दिवस ओ कालो दिन मनैना निर्णय करल हो ।

उहे बैठकसे मोर्चाके केन्द्रिय कार्यकारी अधिकार कार्यबाहक संयोजक चौधरीहे डेहल बा । ओस्टके मोर्चासे टीकापुर राजबन्दी संगम थारु, नन्दुराज चौधरी लगायत २३ जनहनहे सदस्य ओ सल्लाहकारमे मनोनयन करल बा ।

टीकापुर घटनाहे लेके मोर्चासे हरेक बरस विद्रोह दिवस मनैटी आइल बा । संविधान लेखनके क्रममे २०७२ भदौं ७ गते थरुहट आन्दोलनकारी ओ प्रहरीबीच दोहोरो झडप हुइबर १ नाबालक ओ ७ प्रहरीके ज्यान जैना मेरके टीकापुर घटना घटल रहे ।

ओकर डोसर सकारे भदौ ८ गते कफ्र्यू जारी करल अवस्थामे थारु समुदायके ८० से ढिउर घर, पसल, एफएमलगायत संरचना उपर आगजनी करल रहे ।

उ घटनाके मुद्दामे सांसद रेशम चौधरी सहित नेता कार्यकर्ता जेल सजाय भोग्टी रहल बाटै ।