जनताके साथ पाइक लाग आनीबानी सुधारे परल

पहुरा समाचारदाता
धनगढी, २२ सावन । नेकपा (माओवादी केन्द्र) निकट थारु राष्ट्रिय मुक्ति मोर्चा सुदूरपश्चिम प्रदेश कमिटीके लावा नेतृत्व चयन हुइल बा । शनिच्चरके कञ्चनपुरके कृष्णपुर नगरपालिकास्थित सिंङपुरमे हुइल मोर्चाके प्रदेश स्तरीय सम्मेलनसे प्रदेशमे लावा नेतृत्व चयन करल हो ।

मोर्चाके प्रदेश अध्यक्षमे वीरबहादुर चौधरी अध्यक्षमे चयन हुइल बाटै । ओस्टके, सचिवमे बालकृष्ण चौधरी (विकास), सहसचिवमे निराशा चौधरी (तुलना) ओ अनिल कठरिया चयन हुइल बाटै । मोर्चाके सात पदाधिकारीसहित ७१ सदस्यीय प्रदेश कमिटी बनाइल बा ।

ओहे बिच शनिच्चरके रोज हुइला मोर्चाके उद्घाटन सत्रमे बोलुइया वक्ताहुक्रे नेता जनताके साथ पाइक लाग आनीबानी सुधार करे पर्ना बटैले रहिट ।

उहाँहुक्रे शुभकामना मन्तव्य डेटी उहाँहुक्रे जनताके साथ पाइक लाग आनीबानी सुधार करे पर्ना आवश्यक रहल बटाइल हुइट । कार्यक्रममे बर्का पहुना समेत रहल मोर्चाके केन्द्रीय उपाध्यक्ष देवीलाल चौधरी २०६४ के थारु राष्ट्रिय मुक्ति मोर्चा बने सेक्ना कि नैसेक्ना उ चुनौती अब्बे रहल बटैलै ।

‘हम्रे कहीँ न कहीँ बिग्रल कारण जनता हम्रहीनहे अब्बे साथ नैडेहल हुइट’, उहाँ कहलै ।‘हमार आनीबानी सुधार कैलेसे जनता फेनसे साथ डिही ।’ मोर्चासे उठैटी आइल पूर्ण समानुपातिक सहभागिताके मुद्दा आभिन फेन सम्बोधन हुइ नैसेकल चौधरीके कहाइ रहे ।‘हमार उठाइल मुद्दा पूर्ण रुपमे सम्बोधनके लाग संघर्ष कैना आवश्यक रहल बा’, उहाँ थप्लै ।‘जबसम मुद्दा पूर्ण रुपमे सम्बोधन नैहुइ टबसम संघर्ष कैना आवश्यक बा ।’

तत्कालीन समयमे माओवादीसे टमान उत्पीडित वर्ग, जाति, समुदायके मुक्तिके लाग टमान वर्गीय, जातीय मोर्चा बनाइल रहे । उहे क्रममे २०५४ सालमे थारु राष्ट्रिय मुक्ति मोर्चाके उदय हुइल रहे ।

वर्गीय मुक्तिके साथसाथे जातिय मुक्तिके आवाज उठाइक लाग थारु राष्ट्रिय मुक्ति मोर्चाके उदय हुइल माओवादी नेतृ एवम् सुदूरपश्चिम प्रदेशके भूमि, व्यवस्था, कृषि तथा सहकारीमन्त्री विनिता चौधरी बटैली । उहाँ थारु समुदायके अधिकार प्राप्तीके लाग मोर्चासे सशक्त रुपमे आवाज उठैटी आइल उल्लेख करली ।

‘अब्बे मोर्चासे पहिचानके मुद्दा छोरसेकल कहिके भ्रम फैलैना काम हुइटी रहल बा’, चौधरी थप्ली,‘ओइसीन भ्रममे नैपर्ना ओ भ्रमहे चिरके आघे बह्रना आवश्यक बा ।’ मोर्चासे उठाइल एजेन्डाहे माओवादी पार्टीसे संगसंगे लैजैटी रहल उहाँके कहाइ रहे ।‘ज्या एजेन्डा बावै, उहीहे निष्कर्षमे पुगाइक लाग मोर्चाहे आउर सशक्त बनैना आवश्यक बा’, उहाँ कहली ।

उद्घाटन सत्रहे नेकपा (माओवादी केन्द्र) के प्रदेश अध्यक्ष हरि चौधरी उत्सव, कञ्चनपुर जिल्ला अध्यक्ष टेकेन्द्र भट्ट, लगायत सम्बोधन करल रहिट । सम्मेलनसे प्रदेश स्तरीय लावा नेतृत्व चयन कैना जनाइल बा । सुदूरपश्चिम प्रदेशमे कैलाली, कञ्चनपुरमे थारु समुदायके बसोबास रहल बा ।