स्वास्थ्य उपचार पैना हरेक नागरिकके नैसर्गिक अधिकार होः गाउँपालिका अध्यक्ष राजसमझ

मानसिक स्वास्थ्य सम्बन्धी छलफल

पहुरा समाचारदाता
हसुलिया, २२ सावन । मनोसामाजिक तथा मानसिक स्वास्थ्य सम्बन्धी कैलारी गाउँपालिकामे छलफल कार्यक्रम हुइल बा ।

कोसिस नेपालके आयोजनामे अँटवारके रोज कोभिड–१९ माहामारीबाट प्रभावित महिला यूवा तथा पिछाडिएका वर्ग समुहका लागि मानसिक तथा मनोसामाजिक स्वास्थ्य सहयोग परियोजना अन्तर्गत छलफल कार्यक्रम हुइल हो ।

गाउँपालिका अध्यक्ष राजसमझ चौधरीके वडका पहुनामे हुइल कार्यक्रममे उहाँ मानसिक समस्या रहल व्यक्तिहुकनके लाग वडा नम्बर ८ मे रहल प्राथमिक स्वास्थ्य केन्द्रसे औषधी उपचारके व्यवस्था मिलाइल बटैलै । हरेक व्यक्ति स्वास्थ्य उपचार पैना ओइनके नैसर्गिक अधिकार हो,’ गाउँपालिका अध्यक्ष कहलै, ‘कोइ व्यक्ति स्वास्थ्य उपचार पैनासे बन्चित नहोए कहटी वडा कार्यालयके सिफासिसमे निःशुल्क औषधी उपचारके व्यवस्था कैगिल बा ।’ मानसिक समस्या रहल व्यक्तिहनहे फरक दुष्टिसे हेरजैटी रहल ओरसे अव दुष्टिकोणमे परिवर्तन नाने पर्ना उहाँ बटैलै ।

गाउँपालिका उपाध्यक्ष तथा कार्यक्रमके विशिष्ट पहुना भगवतीकुमारी कोभिडके कारण ढेर महिला, बालिका मानसिक समस्यामे परल बटैलै । कोरोनाके बन्दाबन्दीके समस्या महिला, बालबालिका, विद्यार्थी समस्या भोगे परल बटैली । कार्यक्रममे प्रमुख प्राशसकीय विरबहादुर ऐर, सामाजिक विकास अधिकृत यगम कलेल, शिक्षा शाखा प्रमुख गणेश प्रकाश मिश्र, स्वास्थ्य शाखाके सिअनमी अनिता चौधरी, प्रत्येक वडासे २÷२ ठो स्वास्थ्य स्वम सेविका, सिएफसिसिके अध्यक्ष रमेश चौधरी लगायत सरोकारवाला संघसंस्थाके प्रतिनिधिहुकनके सहभागितामे छलफल कार्यक्रम हुइल रहे ।

कार्यक्रममे सहजीकरण कोसिस नेपाल सुदूरपश्चिम प्रदेशके मनोसामाजिक विमर्शकर्ता पशुपति खाती करले रहिट । कैलारी गाउँपालिकामे मानसिक समस्या रहल व्यक्तिहुकनके बारे छलफल करटी मानसिक समस्याके कारण, मानसिक समस्यासे बच्ना उपायबारे, औषधीउपचारबारे सहजीकरण कैगिल रहे । कार्यक्रममे संचालन कोसिसके सरिता चौधरी करले रही ।

कैलारी गाउँपलिकाके स्वास्थ्य प्रमुख वीरेन्द्र सापकोटा गाउँपालिका सक्कु मानसिक समस्याहे ध्यानमे रख्टी वडा नम्बर ८ उदासीपुरके प्रथामिक स्वास्थ्य केन्द्रसे डिप्रेसन, मृगी, साइकोसिस, ओ एपिलिप्सी रोग सम्बन्धी औषधी निःशुल्क उपलब्ध करैटी आइल बटैलै । उहाँ १ जाने परामर्शदाता व्यवस्था रहल बटैलै । मानसिक समस्या रहल व्यक्तिहुकनहे निःशुल्क स्वास्थ बिमाफे करैटी आइल स्वास्थ्य प्रमुख सापकोटा बटैलै ।

कैलारी गाउँपालिका वडा नम्बर ८ स्थित प्राथमिक स्वास्थ्य केन्द्रमे करिब १०० जाने मानसिक स्वास्थ्य समस्या रहल व्यक्तिहुक्रे उपचार करैटि रहल स्वास्थ्य केन्द्रके इञ्चार्ज रामकिशोर चौधरी बटैलैं । जेम्ने छारेरोगके, मानसिक असन्तुलन रहल, डिप्रेशन, चिन्तारोग ओ सुस्तमनस्थिति रहल व्यक्ति औषाधीउपचार करैटी रहल केन्द्रके इञ्चार्ज चौधरी बटैलैं ।