कैलारी गाउँपालिका सुरु करल वडा कार्यालयसे बृद्धा भत्ता वितरण
पहुरा समाचारदाता
हसुलिया, २३ सावन । कैलालीके कैलारी गाउँपालिका पहिल चो वडा कार्यालयसे बृद्धा भत्ता वितरण सुरु करले बा ।
गाउँपालिका अध्यक्ष राजसमझ चौधरी सोम्बारसे वडा नम्बर ६ के कार्यालयसे पहिल बार वडामे बृद्धा भत्ता वितरणके व्यवस्था मिलाइल बटैलै । उहाँ कहलै, ‘बैंकहुकनहे हम्रे कहले बटी, पहिल किस्ता व्यवस्थापन कैना बैंकसे बुझाई उ अपन ठाउँमे बा । अइना दिनमे गाउँठाउँमे जाके नइबुझैलेसे बैंकसे खाता हटैबी ।’
बृद्धबुद्धाहुकनहे हसुलिया बजारमे रहल बैंकमे बृद्धा भत्ता बुझे आईबेर समस्या हुइटी रहल ओरसे आबसे वडा कार्यालयसे ओकर व्यवस्था मिलाइल उहाँ बटैलै । वडा नम्बर ६ के कार्यालयसे सुरुवाट हुइल बृद्धाभत्ता आब सक्कु वडा कार्यालयमे वितरण हुइना गाउँपालिका अध्यक्ष बटैलै ।
वडा नम्बर ६ के वडा अध्यक्ष प्रेमबहादुर चौधरी एनआइसि एसिया बैंक सुरक्षाके साथ आके वडा कार्यालयमे पहिल बार बृद्धा वितरण करटी रहल बटैलै । अपने गाउँठाउँमे बृद्धाभत्ता वितरणके व्यवस्था हुइलपाछे नेंगे नइसेक्ना बुह्राइल मनैनहे हसुलिया जैना बाध्यता हटल बा ।
