वडा सदस्य चौधरीके श्रद्धान्जली सभा

पहुरा समाचारदाता
धनगढी, २५ सावन  । नेपाली काँग्रेस कैलाली क्षेत्र नम्बर ३ पूर्व क्षेत्रीय सदस्य तथा कैलारी गाउँपालिका वडा नम्बर ७ से वडा सदस्यमे निर्वाचित हुइल स्वर्गीय उमेशकुमार चौधरीके १३औ्र दिनके पूण्यतिथिमे बुधके रोज श्रद्धान्जली सभा कार्यक्रम कैगिल बा ।

नेपाली काँग्रेस कैलारी गाउँपालिकासे आयोजित श्रद्धान्जली सभा कार्यक्रमके वडका पहुना जिल्ला सभापति नारायणदत्त भट्ट पार्टी एक ठो कुशल कार्यकर्ता गुमाइल परल बटैलै ।

विशिष्ट पहुनामे कैलारी गाउँपालिका अध्यक्ष राजसमझ चौधरी वडा नम्बर ७ से सबसे ढेर सल्लाह सुझाव डेहुइया सदस्य गुमाइल बटैलै । उहाँ पार्टीके कर्ता केल नाही सामाजिक व्यक्ति रहल ओरसे समाजहे हुकान आवश्यकता पर्ना बटैलै । स्वर्गीय उमेशके परिवारिक अवस्था कम्जोर रहल ओरसे बालबच्चाहुकन पढाईक लाग गाउँपालिका अभिभावकत्वके जिम्मेवारी निर्वाह कर्ना अध्यक्ष बटैलै ।

गाउँपालिका उपाध्यक्ष भगवतीकुमारी चौधरी स्वर्गीय उमेश चौधरी जैसिक व्यक्तित्व पैना नम्मा समय लग्ना बटैली ।
कैलारी गाउँपालिका वडा ७ के वडा अध्यक्ष दिपेन्द्र बहादुर बम स्वर्गीय उमेश चौधरीके लर्कनके पह्रैना जिम्मा पार्टी ओ पालिकाहे लेडेना आग्रह करलै ।

कार्यक्रममे जिल्ला उपसभापति खेमराज डगौंरा, जिल्ला सचिव केशव मिश्र, महासमिति सदस्य गणेश बहादुर देउवा, महासमिति सदस्य रामचरण चौधरी लगायत स्वर्गीय उमेशकुमार चौधरीप्रति श्रद्धाञ्जली अर्पण करटी कुशल नेतृत्वकर्ता गुमाइल बटैलै । कार्यक्रम नेपाली काँग्रेस कैलारीके सभापति कृष्णप्रसाद चौधरीके अध्यक्षतामे हुइल ।