तीन पालिकामे लैङिक हिंसा विरुद्ध पूर्व तयारी तथा प्रतिकार्य योजना बनैना

पहुरा समाचारदाता
धनगढी,३१ सावन । कैलालीके १३ स्थानीय तह मन्से तीन पालिकामे लैङिक हिंसा विरुद्ध पूर्व तयारी तथा प्रतिकार्य योजना बनाजैना बा ।

केयर नेपालके आर्थिक सहयोगमे ओरेक नेपालके सहकार्यमे तारङगिनी फाउण्डेशके आयोजनामे विपद तथा आपतकालिन अवस्थामे लैङिक हिंसा विरुद्ध पूर्व तयारी तथा प्रतिकार्य योजना ओ सहयोगी संयन्त्रके सुदृढिकरणके लाग हुइल छलफल कार्यक्रममे पहिल चरणमे कैलालीके धनगढी उपमहानगरपालिका, कैलारी ओ जोशीपुर गाउँपालिकामे उ योजना तयार कैना कहल हो ।

धनगढी उपमहानगरपालिकाके नगरउपप्रमुख कन्दकला राना अपन पालिकामे विपद तथा आपतकालिन अवस्थामे लैङिक हिंसा विरुद्ध पूर्व तयारी तथा प्रतिकार्य योजना बनैना तयार रहल बटैली । कैलारी गाउँपालिकाके वडा नम्बर ४ के वडा अध्यक्ष ठागुराम चौधरी अपन पालिका विपदके उच्च जोखिममे रहल ओरसे लैङिक हिंसा विरुद्ध पूर्व तयारी तथा प्रतिकार्य योजना बनैनामे सहयोग ओ समर्थन रहना बटैली । ओस्टेक जोशीपुर गाउँपालिकाके उपाध्याक्ष रेखा कठरिया अपन पालिकामे लैङिक हिंसा विरुद्ध पूर्व तयारी तथा प्रतिकार्य योजना बनसेकल बटैली ।

कार्यक्रममे जिल्ला प्रशासन कार्यालय कैलालीके प्रमुख प्रशासकीय अधिकृत शिवराज जोशी, इन्सेक प्रदेश संयोजक खडकराज जोशी, राष्ट्रिय मानव अधिकार आयोग प्रदेश कार्यालय प्रमुख मोहनदेव जोशी, नेपाल रेडक्रस सोसाइटीके मन्त्री लोकराज जोशी, गैरसरकारी संस्था महासंघ प्रदेश सचिव लोकमान धामी, फाया नेपालके कार्यकारी निर्देशक शेरबहादुर बस्नेत, बार कैलालीके सचिव प्रेम बहादुर शाही, महिला मानव अधिकार रक्षक संजालके अम्बिका भण्डारीसे विपद तथा आपतकालिन अवस्थामे लैङिक हिंसा विरुद्ध पूर्व तयारी तथा प्रतिकार्य योजना बनाईबेर सक्कु जानेक समन्वय ओ सहकार्यमे बनाइ पर्ना सुझाव डेहल रहिट ।

कार्यक्रमके ओरेक नेपालके अध्यक्ष डा. रेणु अधिकारी सहजीकरण करटी लैगिंक हिंसाके अवधारणा, विपद तथा आपतकालिन अवस्थामे लैङिक हिंसा, विपद तथा आपतकालिन अवस्थामे हुइना लैङिक हिंसा विरुद्ध रोकथाम ओ व्यवस्थापनके लाग पूर्वतयारी तथा प्रतिकार्य योजनाके आवश्यकता, प्रतिकार्य योजनाके खाका बनैना अभ्यास, कैलारी गाउँपालिकाके संयोजकत्वमे तयार करल पालिकास्तर लैङिक हिंसा विरुद्ध सहयोगी संयन्त्रके नक्साङकनके जानकारी तथा छलफल करैले रहिट । कार्यक्रमके संचालन ओरेक नेपाल कैलालीके जिल्ला संयोजक विनु राना ओ स्वागत फिल्ड सुपरभाइजर सरिता चौधरी करले रहिट ।