कृषि व्यवसाय सेवा प्रदायक संजाल गठन
पहुरा समाचारदाता
हसुलिया, ५ भदौ । कैलालीके कैलारी गाउँपालिका–८ मे कृषि व्यवसाय सेवा प्रदायक संजाल गठन कैगिल बा ।
अँटवारके रोज हसुलियामे आयोजित एक कार्यक्रममे दिगो विकास समाज भजनी, वल्र्ड भिजन इन्टरनेशल नेपाल ओ डिफयाटसे संचालित महिला तथा आप्रवासीहरुको आर्थिक पुनस्र्थापना परियोजना उ संजाल गठन हुइल हो ।
कैलारी गाउँपालिका अध्यक्ष राजसमझ चौधरीके वडका पहुना ओ गाउँपालिका उपाध्यक्ष भगवतीकुमारी चौधरीके विशिष्ट पहुनामे हुइल एक कार्यक्रम मार्फत उ संजाल हुइल रहे ।
संजालके संयोजकमे गाउँपालिकाके कृषि शाखाके हेमराज ढुङगाना रहल बटै । ओस्टेक उपसंयोजमे क्रिमलाल चौधरी, कोषाध्यक्षमे लक्ष्मी चौधरी, सचिवमे विषराम चौधरी रहल बटै । ओस्टेक सदस्यमे विप्नी चौधरी, दिपक चौधरी, दुर्गा चौधरी, सिता चौधरी, सिविसा चौधरी, फुलकुमारी चौधरी, प्रमिला चौधरी, प्रजिना चौधरी, हिरा चौधरी रहल बटै ।
कृषि व्यावसायसे उत्पादन करल टिना लगायत बस्तु स्थानीयस्तरसे प्रदेशसम पुगैटी बजारीकरणसमेट करेक लाग संजाल गठन करल हो ।
कार्यक्रममे वडका पहुना रहल कैलारी गाउँपालिका अध्यक्ष राजसमझ चौधरी दिगो विकास समाज भजनी, वल्र्ड भिजन इन्टरनेशल नेपालसे संचालन करल कार्यक्रम मजा रहल ओरसे एक वडा केल नाही पालिकाके सक्कु वडामे संचालन कैना सुझाव डेलै ।
यी संस्था विपन्न, दलित, कमैया, अपाङता, एकल महिलाहे समेटके कार्यक्रम संचालन कैले बा यि बहुत मजा पक्ष हो,’ उहाँ कहलै, ‘और वडामे सिमान्तकुत, मुक्तकमैया, दलित समुदायके बसोबास संस्थासे कार्यक्षेत्र विस्तार आवश्यक बा । अब्बे वडा–८ मे कार्यक्रम करल बा, यहाँ आर्थिक अवस्था सुधारमे सहयोग पुगी ।’ गाउँपालिका कृषि क्षेत्रमे विशेष फोकस डेहे आघे बह्रटी रहलफे गाउँपालिका अध्यक्ष बटैलै ।
कार्यक्रमके विशिष्ट पहुना गाउँपालिका उपाध्यक्ष भगवतीकुमारी चौधरी परम्परात ढंगसे कुषि, तरकारी करटी आइलबेला दिगो विकास समाज भजनी, वल्र्ड भिजन इन्टरनेशल नेपालसे नानल कार्यक्रमसे कृषकहे ठप सहयोग पुगल बटैली ।
कृषकसे उत्पादनसे बस्तु बजारीकरण नइहुइलपाछे ओस्टे खेर जैटी रहलबेला यी संस्थासे तालिमसंगे बजारीकरणमे सहयोग करलपाछे विपन्न, दलित, कमैया, अपाङता, एकल महिलाके आर्थिक अवस्थामे सुधार अइना उहाँ विश्वास करली । कैलारी–८ के श्रमशिल सहकारीमे पालिकासे सहयोग करलपाछे उद्योग स्थापना ओ रोजगारी सृजना हुइल उपाध्यक्ष बटैली ।
दिगो विकास समाज भजनीके सहसचिव धनीराज राजीके अध्यक्षतामे हुइल कार्यक्रममे कैलारी गाउँपालिका–८ के वडा अध्यक्ष तारामल कठरिया, नव गठित संजालके संयोजक हेमराज ढुङगाना, महिला तथा बालिका शाखाके प्रमुख बालकुमारी चौधरी लगायत अपन बाट राखल रहिट ।
कार्यक्रममे महिला तथा आप्रवासीहरुको आर्थिक पुनस्र्थापना परियोजना अधिकृत प्रभुनाथ ढकाल संस्थासे करटी गतिविधि ओ कृषि व्यवसाय सेवा प्रदायक संजालके काम, कर्तव्य ओ गठन प्रक्रियावारे जानकारी डेहल रहिट । कार्यक्रमके संचालन दिगो विकास समाजके सहजकर्ता मुकेश चौधरी करले रहिट ।
कार्यक्रममे गाउँपालिकाके प्रमुख प्रशासकीय अधिकृत विरबहादुर ऐर, दिगो विकास समाजके परियोजना संयोजक आशिष उपाध्याय, फिल्ड सहजकर्ता रमला चौधरी, पशु शाखाके सुर्य प्रसाद चौधरी, कृषि शाखाके मैया चौधरी, वडा–८के वडा सदस्य, टमान कृषक समुह, सहकारीके प्रतिनिधिहुकनके सहभागिता रहल रहे ।
