कैलालीके माघी होमस्टेमे लाटोकोसेरो उत्सव हुइना

पहुरा समाचारदाता
धनगढी, ६ भदौ । कैलालीके घोडाघोडी नगरपालिका–४ स्थित माघी होमस्टे थारु गाउँमे इ बरस नेपाल लाटोकोसेरो तथा हुचिल उत्सव हुइना हुइल बा ।

चिरैँनके क्षेत्रमे काम कैटी आइल संस्था फ्रेन्ड्स अफ नेचर (फोन) ओ चरा संरक्षण सञ्जाल कैलालीके संयुक्त आयोजनामे माघी होमस्टेमे उत्सव हुइना तय हुइल हो । उ उत्सव आयोजना कैना घोडाघोडी नगरपालिकाके कार्यालय, डिभिजन वन कार्यालय पहमानपुर ओ नेपाल पंक्षी संरक्षण सङ्घ (बीसीएन) सहकार्य कैना बावै । उत्सव अइना माघ २० ओ २१ गते दुई दिन आयोजना हुइना जनाइल बा ।

इहीसे आघे, सन २०१९ मे स्याङ्जाके राङभाङमे नवौं लाटोकोसेरो तथा हुचिल उत्सव हुइल रहे । किसाननके संघरियाके रुपमे चिन्हजैना उल्लू अर्थात लाटोकोसेरो तथा हुचिलके संरक्षणमे टेवा पुगैना उद्देश्यसे नेपालमे आयोजना कैटी आइल इ उत्सव दुई बरससम कोरोना महामारीके कारण हुइ नैसेकल ।

हरेक बरस हुइना लाटोकोसेरो तथा हुचिल उत्सव दुई बरसपाछे इ बरस कैलालीके माघी होमस्टेमे आयोजना कैना टुङ्गो लागल फ्रेन्ड्स अफ नेचरके निर्देशक एवम् उल्लू संरक्षणकर्मी राजु आचार्य जानकारी डेलै ।‘इ बरस माघी होमस्टेमे लाटोकोसेरो तथा हुचिल उत्सव आयोजना कैना पक्का हुइल बा’, उहाँ कहलै,‘ठाउँके टुङ्गो लागल । मने, आउर छलफल हुइल नैहो । आब कैसिक आयोजना कैना कहिके सल्लाहके लाग हमार फेनसे उ स्थानमे आबी ।’

उत्सव आयोजनाके लाग स्थान अवलोकन करे कुछ दिन आघे किल फ्रेन्ड्स अफ नेचरके टोली कैलाली आइल रहे । उ टिमसे उत्सव आयोजनाके लाग माघी होमस्टेके अवलोकन कैनाके साथे स्थानीयसंग छलफलसमेत करल रहे ।

विश्व रामसारमे सूचीकृत घोडाघोडी ताल एवम् घोडाघोडी चरा अभयारण्य क्षेत्रमे रहल माघी होमस्टेमे इ बरस लाटोकोसेरो तथा हुचिल उत्सव आयोजना हुइना हुइलपाछे स्थानीयसमेत खुशी हुइल बाटै । इ उत्सवसे यहाँ संरक्षणबारे थप सचेतना फैलैनाके साथे पर्यापर्यटन विकासमे फेन टेवा पुगैना चराविदसमेत रहल हिरुलाल डङ्गौरा बटैलै ।‘सबके प्रयाससे यहाँ लाटोकोसेरो तथा हुचिल उत्सव हुइना हुइलपाछे खुशी हुइल बाटी’, उहाँ कहलै ।

फ्रेन्ड्स अफ नेचरके अनुसार लाटोकोसेरो तथा हुचिल उत्सवमे लाटोकोसेरो तथा हुचिलके बारेम टमान जानकारीमूलक म्युजियम प्रदर्शनी कैना करल बा । ओस्टके, स्थानीय समुदायके नाचगानसहित संरक्षणबारे सन्देश फेन डेना करल बा ।

इहीसे आघे, धादिङ, चितवन, नवलपरासी, गोरखा, कास्की, कपिलवस्तु, दोलखा, खोटाङ ओ स्याङ्जामे इ उत्सव आयोजना होसेकल बा । सुदूरपश्चिम प्रदेशमे भर पहिलचो लाटोकोसेरो तथा हुचिल उत्सव हुइ जैटी रहल बा । इ उत्सव नेपालसहित अमेरिका, इटली ओ भारतमे फेन मनाजैना फ्रेन्ड्स अफ नेचर जानकारी डेले बा ।