कैलारी–४ के गाउँमे फुटवल प्रतियोगिता सुरु

पहुरा समाचारदाता
हसुलिया, ६ भदौ । कैलालीके कैलारी गाउँपालिका–४ के गाउँमे सोम्मारसे पुरुष फुटवल प्रतियोगिता सुरु हुइल बा ।
थारु समुदायके विशेष पर्व अटवारी ओ महिलाहुकनके महान पर्व हरितालिका तिजके उपलक्ष्यमे न्यू यूवा सुन्दर क्लव के गाउँके आयोजनामे पुरुष फुटवल प्रतियोगिता सुरु हुइल हो ।

कैलारी गाउँपालिका अध्यक्ष राजसमझ चौधरीके वडका पहुनामे हुइल फुटवल उदघाटन कार्यक्रममे उहाँ खेलाडी देशके गहना रहल बटैलै । उहाँ कहलै, खेलाडीहुक्रे खेलके माध्यमसे नेपालहे मुलुकमे चिन्हैना काम करले बटै । देशके विकासके लाग यूवाहुक्रे खेलाडीन जस्टे पसिना बहाके काम जैना जरुरी बा ।’ गाउँपालिका अध्यक्ष चौधरी खेल क्षेत्रमे सदा पालिकाके सहयोग रहनाफे प्रतिवद्धता जनैलै ।

कार्यक्रममे कैलारी गाउँपालिका–४ के वडा अध्यक्ष ठागुराम चौधरी अपन वडामे संचालन हुइल प्रतियोगिताहे भव्य ओ सभ्यके खेलाडीहुकन खेलमे सहभागी हुडेना आग्रह करटी प्रतियोगिताके पूर्ण सफलताके कामना व्यक्त करले रहिट । कार्यक्रममे कैलारी गाउँपालिका प्रवक्ता तथा वडा–७ के वडा अध्यक्ष दिपेन्द्र बहादुर बम, वडा–३ के अध्यक्ष सन्तराम चौधरी, वडा–९ के अध्यक्ष खेमराज चौधरी, इप्रका हसुलियाके प्रमुख रामसिंह बोहरा, वडा सदस्य, भल्मन्सा, बुद्धिजिवीहुकनके सहभागिता रहल रहे ।

न्यू यूवा सुन्दर क्लवके अध्यक्ष बृक्षलाल चौधरीके अध्यक्षतामे हुइल उदघाटन कार्यक्रममे स्वागत मन्तव्य तिर्थ प्रसाद नेपाल ओ संचालन टेकेन्द्र परियार करले रहिट । उहीसे आघे प्रतियोगिताके उदघाटन गाउँपालिका अध्यक्ष तथा कार्यक्रमके वडका पहुना राजसमझ चौधरी बल हस्तान्तरण करके कार्यक्रमके उदघाटन करल रहिट । प्रतियोगिताके पहिल रोज हुइल पहिल खेलमे न्यू स्टार क्लव खरुवाखेरासे न्यू यूवा स्पोर्ट क्लव कनरीहे चार गोल मारके जित हुइल बा । कनरीसे एक गोल केल कैना सफल हुइल बा ।

ओस्टेक मंगरके सकारे विहान ८ बजे राहुल किराना पसल सि गाउँ ओ न्यु जनशक्ति यूवा क्लव खरेटी विज पहिल खेल हुइना बा । ओस्टेक दुसरा खेल दिनके २ बजे जुनियर यूवा क्लव जुगेडा ओ गौरीगंगा क्लव–११ विच प्रतिस्पर्धा हुइना बा कलेसे मगरके रोज टिसरा खेल कैलारी क्लव–१६ ओ जेवाइसि अत्तरिया विच प्रतिस्पर्धा हुइना आयोजक जनैले बा ।
यिहे भदौ १५ गतेसम्म हुइना पुरुष फुटवल प्रतियोगिताके विजेता एक लाख एक सय पाँच रुप्या ओ उपविजेता पचास हजार एक सय पाँच रुप्या नगद पुरस्कार पैना क्लवके अध्यक्ष बृक्षलाल चौधरी बटैलै ।