१२४ वादी परिवारहे लालपुर्जा

पहुरा समाचारदाता
लम्की, ७ भदौ । भूमि व्यवस्था, सहकारी तथा गरिवी निवारण मन्त्री शशी श्रेष्ठसे भूमिके समुचित प्रयोग करके कृषि उत्पादन ओ उत्पादकत्व बढाके आत्मनिर्भर अर्थतन्त्र विकास कैना सरकारसे योजना बनाके काम सुरु करसेकल बटैले बटी ।

कैलालीके लम्कीचुहा नगरपालिका वडा नं. ३ के वादी बस्तीमे १२४ भूमिहीन दलित जग्गाधनी दर्ता प्रमाण पुर्जा वितरण करटी मन्त्री श्रेष्ठ नदी उकाससे बाँझ जमिनके समुचित प्रयोग कैना ओ कृषिमे उत्पादन ओ उत्पादकत्व बढाके देशभिटर रोजगारी सिर्जना करटी आत्मनिर्भर अर्थतन्त्र विकास कैना सरकारसे योजना बनाके काम सुरु करल बटाइल हुइट ।

मन्त्री श्रेष्ठ संविधानमे लिपिबद्ध नागरिकके सक्कु अधिकार कार्यान्वयन कैना सरकार प्रतिवद्ध रहल ओ भूमिहीन दलित, भूमिहीन सुकुम्वासीके हक अधिकार स्थापित कैना भूमिहीनहे भूमि वितरणके काम करटी रहल बटैली ।

मन्त्री श्रेष्ठसे मुक्त हलिया, कमैया, कमलरी ओ हरवाचरवाके समस्या समाधान कैना कार्यदलसे डेहल प्रतिवेदन अनुसार पहिचान, प्रमाणीकरण कैना, कार्यविधि तयार कैना ओ पुर्नस्थापनाके कामके लाग कार्ययोजना बनाके आघे बढसेकलफे बटैली । नागरिकहे रोजगारीके सिर्जना कैना योजना बनासेकल ओ रोजगारी खोज्न बाहेर नेंगे नइपर्ना करके काम कैना सरकार प्रतिबद्ध हुके लागलफे मन्त्री श्रेष्ठ बटैली ।

उहाँ भूमिहीनहे लालपुर्जा वितरणके काम अभियानके रुपमे आघे बढाइल ओ हालसम गाउँब्लकमे ५० हजारसे ढेर भूमिहीनहे लालपुर्जा वितरण करके कानुनी रुपमे जग्गाके मालिक बनाइल बटैली । मन्त्री श्रेष्ठ यिहे वर्षभिटर ३०० पालिकाके पाँच लाख भूमिहीनहे लालपुर्जा वितरण करसेक्ना ओ दुई वर्षभिटर भूमिसम्बन्धी सक्कु समस्या समाधान कैना मन्त्रालय सक्कु खालके प्राविधिक समस्या, कानुनी ओ कार्यविधिगत जटिलता हटैटी नतिजा डेना करके काम करटी रहलफे बटैली  । उहाँ २०४९ सालसे आघे टमान साझा संस्थामे किसानसे मल लेहक लाग धितो राखल जग्गा लिलामी हुइना अवस्थामे रहल कहटी ओइनके ऋण मोचन कैना अपने लागलफे बटैली ।

कार्यक्रममे सुदुरपशिचम प्रदेशका भुमि व्यवस्था कृषि तथा सहकारी मन्त्री विनिता चौधरी वर्तमान सरकार विपन्न, पिछडा वर्ग ओ पाछे पारल समुदायके हक हितके लाग लागल बटैटी ओकर उदाहरण अब्बे वादी समुदायमे लालपुर्जा वितरण रहल बटैली ।

लम्कीचुहा नगरपालिकाका नगर प्रमुख सुशिला शाही अपने नगर प्रमुखके सपथ लेहल ९३ दिनमे वडा नम्बर ३ के बल्चौरके भुमिहिन वादी समुदायहे लालपुर्जा बाँटल बटैली । अपन कार्यकालय भिटर नगरहे भुमिहिन, सुकुम्बासी ओ अब्यवस्थीत बसोबासी मुक्त पालिका बनैना घोषणा समेत करले बटी ।

राष्ट्रिय भुमि आयोग कैलाली जिल्ला अध्यक्ष यज्ञराज उपाध्याय लम्कीचुहामे १० हजार कित्ता जग्गाके नापजाँच कार्य हुइल ओ यी कित्ताहे प्रक्रियागत रुपमे लालपुर्जा तयार परटी वितरण कैना प्रतिबद्धता जनैलै । सुदुरपश्चिम प्रदेशमे आयोगसे लालपुर्जा वितरण कार्य धनगढीके २२ जाने दलित घरधुरीहे पहिल चो ओ मंगरके रोज लम्कीचुहाके बल्चौर स्ीित बादी बस्तीके १ सय २४ करके जम्मा १ सय ४६ जनहनहे लालपुर्जा वितरण करसेकल उहाँ बटैलै ।

कार्यक्रममे राष्ट्रिय भुमि आयोगके उपाध्यक्ष नहेन्द्र खड्का लालपुर्जा वितरणमे अब्बे प्रतिपक्षमे रहल एमालेसे जनतामे टमान भ्रम सृजना कैना काम करटी रहल आरोप लगैलै । वर्तमान सरकारसे ऐन ओ कार्यविधि बनाके राष्ट्रिय भुमि आयोग, राष्ट्रिय भुमि आयोग जिल्ला कार्यालय ओ नापी विभागके पदाधिकारीके हस्ताक्षर सहित भुमि व्यवस्था सहकारी तथा गरिवी निवारण मन्त्री शशि श्रेष्ठ ओ सुदुरपश्चिम प्रदेशके भुमि व्यवस्था कृषि तथा सहकारी मन्त्री विनिता चौधरीके रोहोबरमे वितरण करल यम्ने ढुक्क रहन वादी समुदायमे आग्रह करलै ।

कार्यक्रममे राष्ट्रिय भुमि आयोगके अध्यक्ष केशव निरौला लम्कीचुहा नगरपालिकाके नगर प्रमुख अपने निर्वाचित हुइल छोट समयमे जग्गा धनी पुर्जा वितरण कैना सफल हुइल कहटी धन्यबाद डेलै । बर्षोसे भुमिहिन वादी समुदायसे भोग्टी आइल समस्या आबके दिन भोगे पर्ना दिन गल बटैलै । जग्गा भनी पुर्जा संगे जिविको पार्जनके कार्यक्रम सञ्चालनके लाग सरकार गम्भीर हुुई पर्नामे जोड डेलै बा । कार्यक्रममे राष्ट्रिय सभाके पुर्व सदस्य कमला कुमारी ओली एमालेके सरकारके पालामे सुरु हुइल काम अब्बे सार्थकता पाइल बटैलै ।

सुदुरपश्चिम प्रदेश सांसद रतन बहादुर थापा कामके शुरुवात जे जैसिक करलेसेफे वर्तमान सरकारसे लालपुर्जा जनताके हातमे डेहे सेकल कहटी वर्तमान नगरप्रमुख ओ गठबन्धन सरकारहे धन्यवाद डेलै ।

कार्यक्रममे लम्कीचुहा नगरपालिकाके उपप्रमुख जुना चौधरी लम्कीचुहा नगरपालिकामे महादेव बजगाईके पालामे तिब्र गतिमे भुमि सम्बन्धी काम हुइल ओरसे अब्बेक नेतृत्व समयमे लालपुर्जा बाँटे सेकल बटैली ।

वडा नम्बर ३ के वडा अध्यक्ष लबबहादुर शाह बल्चौरके बादी बस्तीहे लालपुर्जा वितरण सेकलपाछे गोरांगे, चिसापानी ओ व्यवस्थित नगरमे लालपुर्जा वितरण कैना बटैलै ।

लम्कीचुहा नगरपालिकामे नापनक्साके कार्य तिब्र गतिमे हुके आब लालपुर्जा वितरण कार्य हुइटी रहल बटैटी भुमि आयोग लम्कीचुहाके संयोजक विरेन्द्र शाही बिस्तारे और वडामेफे लालपुर्जा वितरण कैना बटैलै ।

कार्यक्रममे नेपाली कांग्रेस, नेकपा एमाले ओ नेकपा माओवादीके नेताहुक्रे समेत शुभकामना मन्तव्य व्यक्त करल रहिट ।