रेशमके गोसिनीया रञ्जितासे उम्मेदवारी घोषणा

पहुरा समाचारदाता
धनगढी, ८ भदौ । नागरिक उन्मुक्ति पार्टीके अध्यक्ष एवम् रेशम चौधरीके गोसिनीया रञ्जिता श्रेष्ठ चौधरीसे प्रतिनिधि सभा निर्वाचनके लाग आज आपन उम्मेदवारी घोषणा करले बाटी ।

उहाँ कैलाली क्षेत्र नम्बर १ से चुनाव लरक लाग आपन उम्मेदवारी घोषणा करल हुइट । २०७४ के निर्वाचनमे उहे क्षेत्रसे रेशम चौधरी अत्यधिक मतके साथ प्रतिनिधि सभाके निर्वाचन जिटल रहिट ।

२०७४ सालके प्रतिनिधिसभा निर्वाचनमे चौधरी ३४ हजार ३४१ मतसहित निर्वाचित हुइल रहिट । ओहकान निकटतम प्रतिस्पर्धी वाम गठबन्धनसे एमाले उम्मेदवार मदनकुमारी शाह (गरिमा) १३ हजार ४०६ मत पाइल रही कलेसे कांग्रेसके ईश्वरी न्यौपाने ११ हजार २०३ मत पाइल रही ।