अटवारी पर्वके अवसरमे व्याडमिन्टन प्रतियोगिता

पहुरा समाचारदाता
हसुलिया,११ भदौं । कैलालीके कैलारी गाउँपालिकामे एक दिवसिय गाउँपालिकास्तरीय व्याडमिन्टन प्रतियोगिताके आयोजना कैगिल बा ।

थारु समुदायके विशेष पर्व अटवारीके अवसर पारके हिम शिखर क्लव हसुलियाके आयोजना तथा कैलारी गाउँपालिकाके सहकार्यमे एक दिने गाउँपालिकास्तरीय व्याडमिन्टन प्रतियोगिताके आयोजना कैगिल हो । कैलारी गाउँपालिका वडा नम्बर १ के वडा अध्यक्ष धोजहरिपाल बोहराके प्रमुख आतिथ्यमे हुइल कार्यक्रममे विशिष्ट पहुना कैलारीके खेलकुद विभाग संंयोजक तथा वडा नम्बर ३ के अध्यक्ष सन्तराम चौधरी, इलाका प्रहरी कार्यालय हसुलियाके प्रमुख रामसिह बोहरा, गाउँक भल्मन्सा खुशीराम चौधरी रहिट ।

यिहे कैलारी गाउँपालिकाभिटरके विद्युत क्षेत्रमे अतुलनिय योगदान पुगैटी आइल विद्युतके नो लाईट शाखामे कार्यरत केदार चौधरीके यिहे गैल असार ३० गते विद्युत मर्मत कैटी रहल बेला दुर्घटना हुईबेर एक हातमे क्षति पुगल बा । उ दुःखहे सम्झती उहाँक योगदानके कदर करटी क्लव ओ हसुलिया गाउँसे केदार चौधरीहे सम्मान कार्यक्रमफे करल बा । ‘वुई लभ यु केदार जी’ लिखल व्यानरसहितके कार्यक्रम करके उहाँहे सम्झटी सम्मानपत्र सहित सम्मान करल क्लवके संस्थापक सदस्य प्रदीपकुमार चौधरी बटैलै ।

कैलाली जिल्लाके कैलारी गा.पा. वडा नं. १, साविक हसुलिया गा.वि.स हसुलियामे वि.सं २०५७ सालमे जिल्ला प्रसाशन कार्यालय धनगढीमे दर्ता हुके स्थापना हुूइल हिमशिखर क्लब एक सामाजिक संस्था हो । स्थापना कालसे क्लबसे यी क्षेत्रमे टमान मेरिक सामाजिक कार्य, सडकके खाल्डा खुल्डी मर्मत कैना, हसुलिया बजार सरसफाई कैना, दिपेन्द्र मा.वि ओ छिमानन्द स्कुलमे बिल्डिङ कन्सट्रक्सनके काममे स्वमसेवा कैनो साथे हाल सम प्रत्येक वर्ष थारु समुदायके महान पर्व माघ, डस्या लगायत चाड पर्वमे टमान मेरिक कला, सांस्कृतिक नाच, झाँकी, खेलकुद प्रतियोगिता कार्यक्रम अयोजना करके मनैटी आइल बा ।
यिहे सन्दर्भमे यिहे १२ गते अटवारके रोज परल थारु समुदायके विशेष पर्व अट्वारीके शुभ अवसरमे यी क्लबसे कैलारी गाउँपालिका स्तरिय टिसरा एकदिवसिय ब्याडमिन्टन खेल प्रतियोगिता आयोजना करले बा ।

२०७६ सालके अन्त्यओरसे कोरोना कोभिड १९ महामारीसे दुनिया आक्रान्त हुइल ओ विश्व जगत थप्प हुइल बेला यी हसुलिया बजार तथा क्लवके खेलप्रेमी युवाहुक्रे यी खेलहे आत्मसाथ करके पालिका क्षेत्रमे पहिल चो खेलके शुरुवात करल रहिट । यी खेलके लोकप्रियता बढटी जाईबेर विगत २ वर्षसे गाउँपालिकास्तरिय प्रतियोगिता आयोजना कैना आँट हिमशिखर क्लब डेखैले बा ।

ओस्टेक करके गाउँपालिकाके प्रवक्ताहे सम्बोधन करटी उ क्लवसे ६ बुँदे माग सहिट ज्ञापनपत्र बुझैले बा ।
ज्ञापनपत्र मार्फत क्लवसे कैलारी गा.पा. वडा नं. ४ के गाउँमे खेलकुदके लाग कभर्ड हल बन्ना योजना सच्याके, पालीका भरके जनताके एक्के अवाज अनुरूप कैलारी गा.पा ३ भररीके खेल मैदान, सक्कुहुनके पाएक पर्ना स्थानमे बनाई पर्ना माग करले बा ।
यिहे गैल असार ३० गते कैलारी गा.पा. १ हसुलिया गाउँ निवासी तथा विद्युत प्राधिकरण हसुलिया नो लाइट शाखाके प्राविधिक कैदार चौधरीके ड्यूटिके क्रममे आकस्मिक दुर्घटना हुके उपचारके क्रममे दाहिन हाथ गुमाई परलमे क्लब तथा गाउँके ओरसे दुख व्यक्त ओ समभाव प्रकट करटी वहाँके विद्युत प्राधिकरण प्राविधिक पदके सट्टा निकट भविष्यमे गा.पा. स्तरिय विद्युत शाखा कार्यालय स्थापना हुइना ओरसे उ शाखामे सोधपूछ कक्ष कर्मचारी वा सहज हुइना पदके लाग पहल करे पर्ना माग करल बा ।

कैलारी गा.पा. हसुलिया बजारमे इन्डोर ब्याडमिन्टन भवन निर्माणके लाग बजेट विनियोजन करे पर्ना, दिपेन्द्र माविहे बहुमुखी क्याम्पस बनैना हाली पहल करे पर्ना, हसुलिया बजार लगाएत पालिकाके सक्कु बजारहे ग्राहकमय बनैना, बिना भन्सार सिमा नाकासे अइना सामानहे रोक्न छोटी भन्सार स्थापनाके लाग पहल करे पर्ना माग करल बा ।

ओस्टेक करके हसुलिया बजार रहल नालाके जग्गा अतिक्रमण करके बनाइल संरचनाहे हटाई पर्नाफे ज्ञापनपत्र मार्फत माग करल बा । व्याडमिन्टन प्रतियोगिताके उदघाटन कार्यक्रम क्लवके अध्यक्ष सुनिल चौधरीके अध्यक्षतामे हुइल रहे । कलेसे क्लवके सदस्य सुरज चौधरी ओ स्वागत मन्तव्य संस्थापक सदस्य प्रदीपकुमार चौधरी करले रहिट ।
शनिच्चर विहान ७ बजेसे सुरु हुइल प्रतियोगितामे २६ ठो टिमके सहभागिता रहल बा । प्रतियोगिताके पहिल पुरस्कार ११ हजार, दुसर पुरस्कार ६ ओ सन्त्वाना पुरस्कार टी शर्त ओ प्रमाणपत्र वितरण कैना बा ।