रामपुर कटैनी काठे पुलके अनुगमन

पहुरा समाचारदाता
हसुलिया, १६ भदौ । कैलालीके कैलारी गाउँपालिका वडा नम्बर ७ रामपुर कटैनी काठे पुलके अनुगमन कैगिल बा ।

गाउँपालिकाके एक लाख ५० हजार आर्थिक सहगोगमे निर्माण हुइटी रहल उ काठे पुलके विफेक रोज गाउँपालिका अध्यक्ष राजसमझ चौधरी, गाउँपालिका उपाध्यक्ष भगवतीकुमारी चौधरी, गाउँपालिकाके प्रवक्ता तथा वडा नम्बर ७ के वडा अध्यक्ष दिपेन्द्रबहादुर बम, नेपाली काँग्रेस कैलारीके सभापति कृष्णप्रसाद चौधरीलगायतसे अनुगमन करल गाउँपालिकाके योजना शाखा प्रमुख सन्तोषकुमार चौधरी जानकारी डेलै ।

करिब निर्माण सम्पन्न हुइना क्रममे रहल उ पुलके दुनु साइडओर माटी फिलिङके केल काम बाँकी रहल उहाँ जनैलै । उ पुलमे मनैनके आवतजावत करे अवस्था हुसेसेकल उहाँ जनैलै । बाढ अइटी रहलक कारण माटी फिलिङ भर करे नइगैल योजना शाखा प्रमुख बटैलै । असार महिनामे कटैनी लडियामे आइल बाढ उ काठे पुहाइलपाछे खेतीपातिके लाग विशेष आवतजावतमे समस्या हुइल रहे ।

बर्खाबुन्दीके समय रहल ओ लडियामे प्राय जैसिन पानीके बहाव ढेर हुइलक ओरसे समयमे निर्माण करे नइसेक्गिल प्रवक्ता दिपेन्दबहादुर बम बटैलै । ओस्टेक करके गाउँपालिकाके आर्थिक सहयोग तथा स्थानीयहुकनके जनश्रमदानमे कटैनी लडियाके छटकपुर बसन्तामे पुहल काठे पुलके कामफे हुइटी रहल उहाँ बटैलै । दुनु पुल बहुट जल्डी संचालनमे अइनाफे वडा अध्यक्ष बम बटैलै ।