डेंगुसे ३५ वर्षीया महिलाके मृत्यु

पहुरा समाचारदाता
धनगढी,१६ भदौ । डेंगुके संक्रमणसे कैलालीमे एक महिलाके मृत्यु हुइल बा ।

उपचारके क्रममे ३५ वर्षीया महिलाके मृत्यु हुइल स्वास्थ्य कार्यालय कैलालीके प्रमुख लालबहादुर धामी जानकारी डेलै ।
उहाँक अनुसार धनगढी उपमहानगरपालिका–१२ के ३५ वर्षीया महिलाके निसर्ग अस्पतालमे गैल मंगरके उपचारके क्रममे मृत्यु हुइल हो । अस्पतालसे डेंगु हुइल पुष्टि करल ओ साथे छातीमे समस्या हुइल चिकित्सक जनैले बटै ।

स्वास्थ्य कार्यालय कैलालीसे टेलिफोन मार्फत डेंगुसे मृत्यु हुइल जानकारी डेलेसेफे औपचारिक रूपमे विवरण आइनइसेकल इपिडिमियोलोजी तथा रोग नियन्त्रणके महाशाखाके एक उच्च अधिकारी बटैलै । महाशाखाके अनुसार गैल पुससे हालसम २ हजार ८२७ जनहनमे संक्रमण पुष्टि हुइल बा । देशभर ७२ जिल्लामे डेंगुके बिरामी फेला परल बटै । सबसे ढेर ललितपुरमे एक हजारसे ढेरहे संक्रमण हुइल बा । ओस्टेक करके, काठमाडौं, रूपन्देही, धादिङ लगायतके जिल्लामे डेंगुके प्रकोप बढटी क्रममे बा ।
डेंगु संक्रमित व्यक्तिमे श्वास–प्रश्वासमे कठिनाइ हुइलेसे, पेट बठैना, गिजासे रगत बहल जैैसिन हुइना, दिसा करिया हुइना, उल्टी हुईबेर रगत विल्गैना, बिरामी मुर्छा हुइनालगायत लक्षण डेखलेसे जटिल हो कहिके चिन्हे सेक्जाई । यैसिन लक्षणके संक्रमितहे भर्ना हुके उपचार करे पर्ना वा चिकित्सकके निगरानीमे बैठे पर्ना शुक्रराज ट्रपिकल तथा सरुवा रोग अस्पतालके सरुवा रोग विशेषज्ञ डा. शेरबहादुर पुन बटैठै ।

खासमे डेंगुके कौनो उपचार नइहो । डेंगुके बिरामी चिकित्सकीय सल्लाहअनुसार निगरानीमे रहेबेर संक्रमणसे हुइना मृत्युहे शून्यमे झारे सेक्ना उहाँक कहाई बा । एडिज लामखुट्टेके कारण रोगके संक्रमण हुइना ओरसे घर वरपर फोहोर, पानी जम्न खाल्डाखुल्डी हुइलेसे उहीहे सफा करे पर्ना रहठ ।