डोटीमे गठबन्धन नैकैना काँग्रेसके निर्णय

पहुरा समाचारदाता
धनगढी, १६ भदौ । डोटीमे नेपाली काँग्रेससे कौनोफे दलसंग चुनावी गठबन्धन नइकैना निर्णय करले बा ।
केन्द्रीय गठबन्धनके निर्णयविपरीत डोटीमे एकल चुनाव लरना निर्णय करल हो ।

केन्द्रीय गठबन्धनसे सक्कु जिल्लामे गठबन्धन ओ भागवण्डाके आधारमे निर्वाचनमे जैना निर्णय करल रहे । गठबन्धनके ‘हेभिवेट’ नेताके निर्वाचन क्षेत्रके रुपमे परिचित डोटीमे भागवण्डा ओ टिकटके बाट नइमिल्ना डेखलपाछे यैसिन निर्णय करल बताइल बा ।

नेपाली काँग्रेस डोटीके सचिव गणेश खड्का डोटीमे काँग्रस एक्केली चुनाव लरना निर्णय करल पुष्टि करलै । उहाँक अनुसार बिफेक रोज बैठल जिल्ला कार्यसमितिके बैठकसे यैसिन निर्णय करल हो । ‘गठबन्धनके कौनो आवश्यकता ओ औचित्यता नइहो,’ उहाँ कहलै, ‘डोटीमे हम्रे ऐक्केली लरबी । आज बैठकसे उम्मेदवार बन्ना आकांक्षीफे सिफारिस करले बा ।’
यहाँसे गठबन्धनके नेतृत्व करटी रहल दल नेपाली काँग्रेसके सुदूरपश्चिम प्रदेश सभापति वीरबहादुर बलायर, एकीकृत समाजवादीके नेता प्रेमबहादुर आले ओ नेकपा माओवादी केन्द्रके नेता तथा सुदूरपश्चिम सरकारके मुख्यमन्त्री त्रिलोचन भट्ट प्रतिनिधिसभामे टिकटके लाग दाबी करटी बटै । उहाँहुकनबीच गठबन्धनमे टिकट लेना किचलो चल्टी रहल बेला काँग्रेस डोटी एकल रुपमे चुनाव लरना घोषणा करले बा ।