काँग्रेसके ८० ओ माओवादीके ६० सिटः प्रचण्ड
पहुरा समाचारदाता
धनगढी, २१ भदौ । नेकपा (माओवादी केन्द्र) के अध्यक्ष पुष्पकमल दाहाल सत्तारुढ गठबन्धनमे सिट बाँडफाँटके टुंगो बुधसम लग्ना बटैले बाटै । मंगरके साँझसम कार्यदल स्तरसे सहमतिको प्रयास हुइटी रहल ओ बुधके शीर्ष नेताहुक्रनके बैठकसे टुंगो लगैना उहाँके कहाइ रहे ।
सुदूरपश्चिम प्रदेशके राजधानी धनगढी कैलालीमे पार्टी कार्यक्रमके लाग पुगल दाहाल विमानस्थलमे कहलै, ’कांग्रेससे चर्चा करटी रहल जस्टे १०० सिट कहले बा । पाछे ८० मे अइना सम्भावना बह्रल बा । हम्रे ६० कहले बाटी । ओकर आसपास मिलैना हो । एकीकृत समाजवादी २५ ओ जसपा २५ दाबी करटी रहल स्थिति बा । इहीहे आधार बनाके सक्कु पार्टीके प्रतिनिधि बैठके प्रतिनिधिसभा निर्वाचन क्षेत्र ओ प्रदेश निर्वाचन क्षेत्रसम बैठके टुंगो लगैना, मिलल जत्रा मिलैना ओ ओकरपाछे शीर्ष तहमे बैठके टुंगो लगैना काम हुइल बा ।’
संघीय ओ प्रदेशके सक्कु निर्वाचन क्षेत्रके टुंगो शीर्ष तहसे नै लगैना मेरके काम हुइटी रहल दाहाल जानकारी डेलै । ’निर्वाचनके सन्दर्भमे गठबन्धनमे हम्रे सिटसंख्या क्षेत्र ओ प्रदेश अक्केचो टुंग्याइना कहिके सक्कु पार्टीके प्रतिनिधिहे आज मंगर साँझसमके समय डेहल बा । बुधके शीर्ष नेताहुक्रनके बैठकसे टुंगो लगैना बात हुइल बा,’ उहाँ कहलै ।
सक्कु पार्टीसे करल दाबी सुन्ना ओ पाछे शीर्ष तहसे टुंगो लगैना दाहालके कहाइ रहे । कांग्रेसमे शेखर कोइराला पक्षसे १०० सिट आपन पार्टीहे हुइ पर्ना माग रख्ले बा । अइसीन अवस्थामे दाहालके अइसीन प्रतिक्रिया आइल हो ।
स्थानीय तहके निर्वाचन सफलतापूर्वक सम्पन्न हुइल ओ आगामी अगहन ४ के लाग तोकल संघ ओ प्रदेश निर्वाचन फेन सम्पन्न करे पर्ना दाहालके कहाइ रहे ।
’गैल बरस संविधान मिचजैना, च्याट्ना हो कि कना खतरा रहे । इ निर्वाचन सम्पन्न हुइलपाछे इ खतरा नेपालसे टरके जाइ,’ उहाँ कहलै ।
ओस्टके, प्रतिनिधिसभा ओ प्रदेश सभाके कार्यकाल मनोनयनके आघेक दिनसम रहना बातमे सरकार ओ सत्तारुढ गठबन्धन स्पष्ट रहल दाहालके कहाइ रहे । प्रतिनिधिसभामे संसद्के कार्यकाल लम्ब्याइना व्यवस्थासहितके कानुन संशोधन विधेयक लानलमे दाहाल ओइसीन नैकैना बटैलै ।
’संसद्के कार्यकाल एकदिन फेन यहोरउहाँेर नैकैना कना हो । मनोनयनपाछे संसद् एक दिन फेन नैरही,’ उहाँ कहलै ।
प्रमुख सचेतकके सल्लाहमे विधेयक लानलमे सरकार ओ गठबन्धनसे उहीहे आघे नैबह्रैना निर्णय लेहल उहाँ जानकारी डेलै ।
