पालिकासंग बालबालिका संवाद कार्यक्रम

पहुरा समाचारदाता
मसुसिया, २१ भदौ । कैलालीके कैलारी गाउँपालिकामे पालिकासंग बालबालिका संवाद कार्यक्रम कैगिल बा ।

गाउँपालिका उपाध्यक्ष भगवतीकुमारी चौधरीके वडका पहुनामे हुइल कार्यक्रममे बालबालिकासे उपाध्यक्ष ओ वडा अध्यक्षसंग ८ नम्बर वडा कार्यालयमे संवाद करले बटै । कार्यक्रममे बालबालिकाहुक्रे लागु औषध बढ्टी प्रयोगके नियन्त्रण, बाल श्रम निषेध, विपन्न बालबालिकाहे पह्राई निरन्तरता ओ बालिकासे विद्यालय छोरना करल, अभिभावकसे बालबालिकाके क्रियाकलापमे ध्यान नइडेहल, बालबालिकाके लाग बजेट विनियोजन प्रकृया, बालदिवस, बालिका आत्मरक्षा, बाल मनोपरामर्शके साथ जोखिममे रहल बालबालिकाो सुरक्षा बारेमे जिज्ञासा राखल रहिट ।

बालबालिकाके जिज्ञासाके जवाफ डेटी कैलारी गाउँपालिका उपाध्यक्ष भगवतीकुमारी चौधरी बजेट निर्माणमे बालबालिकाके सवालहे गम्भीरता पुर्वक समावेश कैना, लागुऔषध, बालविवाह, बालश्रम मुक्त गाउँपालिका बनाके हरेक सार्वजनिक सरोकारके विषयगत छलफल बैठकमे बालबालिकाके सहभागिता सुनिश्चित करटी ५ बर्षभिटर बालमैत्री गाउँपालिका बनैना करके कार्ययोजना बनाके लागू कैना बटैलै ।

वडा नं ८ के अध्यक्ष तारामल कठरिया लागुऔषध सेवन कैना बालबालिकाके संख्यामे वृद्धि हुइटी रहल ओरसे यिहीहे न्यूनीकरण कैना विद्यालय तथा समुदाय तहमे जनचेतनामुलक कार्यक्रम कैना, बालिकाके लाग आत्मरक्षा ओ हिंसा विरुद्धके सचेतना कार्यक्रम संचालन कैना बताउनुभयो ।

वडा अध्यक्ष कठरियासे मोबाइल प्रविधिके गलत प्रयोग ओ डेखासिकीसे बालबालिका कुलत, कुसंस्कार ओ असामाजिक क्रियाकलापमे संलग्न हुइल पाइल उल्लेख करटी असल अभिभावकत्वके अभाव रहल बटैले रहिट ।
वडा नं ८ के अध्यक्ष तारामल कठरियाके अध्यक्षतामे हुइल कार्यक्रममे बाल कल्याण संघ टीकापुरके सामाजिक परिचालक प्रकाश बिष्ट कार्यक्रमके उद्देश्यबारे जानकारी डेहल रहिट ।

पत्रकार घनश्याम पौडेलसे सहजीकरण करल कार्यक्रममे बाल कल्याण संघ टीकापुरसे छनोट करल २५ जाने बालबालिकाके सहभागीता रहल रहे । संवाद कार्यक्रम बाल कल्याण संघ टीकापुर, वल्र्ड भिजन नेपालके आर्थिक तथा प्राविधिक सहयोग ओ आयोजनामे हुइल रहे ।