संसदमे महिला प्रतिनिधिके सवाल विषयक अन्तरक्रिया कार्यक्रम

पहुरा समाचारदाता
धनगढी, २२ भदौ । संसदमे महिला प्रतिनिधिहुकनके सवाल ओ दोसर कार्यकालके लाग अब्बे प्रतिनिधि ओ समानुपातिक ओहोर महिला नेतृत्व कैसिक आघे जैनाबारे धनगढीमे छलफल ओ महिला ओइनसंगे अन्तरक्रिया कार्यक्रम हुइल बा ।

कार्यक्रममे नेकपाके केन्द्रीय सदस्य बिन्दा पाण्डे महिला ओइनहे पार्टी पीडित बनाइल कठी, हम्रे यौद्धा हुई आब पीडितके मानसिकता त्यागके लरेपना बा । एक दुसरहे सहयोग ओ समन्वय कैके तथ्यमे तर्क कैलेसे हमार बाट बल्गर रना बटैलि ।

उहाँ कहलि “हम्रे लबिङ्ग करे सेक्बी, केन्द्रमे केल नाही टरे फेन हमार जौन संरचना बा उ भिट्टर डिरधटाके साथ मोर पहिल प्राथमिकता ओ मै पहिल हुइना निर्वाचनमे लर्ना टयार बाटुकना हिसाबसे जाइपरल ।”

सञ्चार माध्यमसे समन्वय कैके आपन बाट लैजाइ, सञ्चार माध्यमफे महिलाके बाट खोटले परल । सञ्चार माध्यममे मै बोल्नु टे कालजाके महि मोर पार्टी किनारा लगाई कना हिसाबसे नैडराई, टबेमारे सञ्चार माध्यमे आपन बाट स्पष्ट रुपमे मै काहे प्रतिनिधि हुइपरल कना बाट लैजाई उहाँ कहली ।

अस्टेक डोटी जिल्लाके निर्वाचन (ख) के प्रत्यक्ष आहोरसे लर्ना टयारी कैटीरहल पूर्णा जोशी कहली “दोसर कार्यकालके लाग टमान ठाँउमे हम्रे पत्येक्ष रुपमे महिला हुक्रे जोरल बाटी, गैल कार्यकाल हमार संघर्सै संघरसमे बिटल कना लागठ सुरुमे अनुभवि अभ्यासमे रही, अब्बे फेन संविधानके सर्वोचता ओ एक खालके गठबन्धनमे बाटी, मोर टयारी कलेक प्रत्येक्ष ओहोर डोटी जिल्लाके निर्वाचन (ख) से मोर नाउ एक नम्बरमे सिफारिस हुइल बा ।”

उहाँ आघे कहली यदि गठबन्धनके हिसाबसे उ क्षेत्र नेपाल कम्युनिष्ट पार्टी एकीकृत समाजवादीके हिस्सामे नैपरी कलेसे समानुपातिकके ओहोरसे एक नम्बरमे मोर नाउ जिल्लाके पार्टी सिफारिस करले बा ।

अस्टेक अन्तरक्रिया कैना क्रममे पाँच नम्बर निर्वाचन क्षेत्रके प्रदेश १ से नाउ सिफारिस हुइल नेतृ शुशिला बुढाथोकी कहली “अब्बे गठबन्धन बा यदि गठबन्धनके हिसाबसे मोर निर्वाचन क्षेत्रमे मै बल्गर उमेदवार हु, मै बिना पैसा खर्च कैले चुनाव लरम ओ जिटम उहाँ कहली ।”

कार्यक्रममे टमान महिला नेता, संघ सस्था ओ महिला पत्रकारके सहभागिता रहे ।