प्रदेश खाद्य परिषद गठन सम्बन्धी छलफल
पहुरा समाचारदाता
धनगढी,२२ भदौ । सुदूरपश्चिम प्रदेश स्तरीय खाद्य परिषद गठन सम्बन्धी बुधके रोज धनगढीमे सरोकारवाला निकायविच छलफल तथा अन्तरक्रिया कार्यक्रम कैगिल बा ।
फियान नेपाल सुदूरपश्चिम प्रदेश कार्यालयके आयोजनामे प्रदेश खाद्य परिषद गठन सम्बन्धी छलफल कैगिल हो । फियान नेपालके प्रदेश संयोजक मुकुन्द रानासे सहजीकरण करल कार्यक्रममे भुमि व्यवस्था तथा कृषि सहकारी मन्त्रालयके कानून अधिकृत राजकुमार झा प्रदेश खाद्य परिषद गठन तथा संचालन कार्यविधि रायके लाग दुई मन्त्रालयमे पठाइल बटैलै ।
उहाँ उ कार्यविधि रायके आर्थिक मामिला तथा कानून मन्त्रालय ओ आर्थिक मामिला तथा योजना मन्त्रालयमे पठाइल जानकारी करैलै । सम्बन्धित दुनु मन्त्रालयसे राय आसेकलपाछे एक चो फेरसे सरोकारवाला विच छलफल कैना मन्त्रालयके कानून अधिकृत झा बटैलै । संघीय ओ प्रदेश चुनाव लग्गे आसेकल ओरसे डसिया आघे छलफल कराईपर्ना सरोकारवाला निकायके प्रतिनिधि सुझाव डेहल रहिट ।
कार्यक्रममे बार कैलालीके अध्यक्ष सिद्धराज ओझा, याक नेपालके परियोजना संयोजक देवीप्रसाद खनाल, फाया नेपालके धनपति ढुङेल, इन्सेकके प्रलेख अधिकृत कृष्ण विक, नेपाल पत्रकार महासंघ कैलालीके सचिव प्रेम चौधरी लगायतसे प्रदेश खाद्य परिषद गठन तथा संचालन कार्यविधि भदौ महिनाभित्रे नाने पर्नामे जोड डेहल रहिट ।
