डेंगु नियन्त्रण कैना सरकारके चार योजना

पहुरा समाचारदाता
धनगढी, २२ भदौ । दिन प्रतिदिन डेंगु रोगके प्रकोप बह्रटी रहल ओरसे सरकारसे यकर नियन्त्रणके लाग चार ठो योजना आघे सरले बा ।

नेपाल सरकार, प्रदेश सरकार ओ स्थानीय तहसे डेंगु रोकथाम ओ नियन्त्रणके लाग पहल कैना ओ ओकर समन्वय, सहजीकरण स्वास्थ्य तथा जनसंख्या मन्त्रालयसे कैना बुधके रोज निर्णय कैगिल बा । डेंगु रोग सरुइया मच्छरके लार्भा ‘खोज ओ नष्ट कर’ अभियानहे तीव्र बनैटी सचेतनामूलक तथा सूचनामूलक श्रव्य तथा श्रव्य–दृश्य सामाग्री टमान माध्यमसे प्रचार प्रसार कैना निर्णय करले बा ।

रोग रोकथाम तथा नियन्त्रणके लाग यथाशिघ्र मोबाईल रिङटोन बनाक प्रचार प्रसार कैनाफे निर्णय कैगिल स्वास्थ्य तथा जनसंख्या मन्त्रालयके प्रवक्ता डा संजयकुमार ठाकुर जानकारी डेलै ।

डेंगुके रोगके संक्रमणसे कैलालीमे भदौ १४ गते एक महिलाके मृत्यु हुइल रहे । उपचारके क्रममे ३५ वर्षीया महिलाके मृत्यु हुइल स्वास्थ्य कार्यालय कैलालीके प्रमुख लालबहादुर धामी जानकारी डेहल रहिट । धनगढी उपमहानगरपालिका–१२ के ३५ वर्षीया महिलाके निसर्ग अस्पतालमे उपचारके क्रममे मृत्यु हुइल रहे ।

दुई जाने डेंगु संक्रमितके मृत्यु

नेपालगन्जस्थित भेरी अस्पतालमे उपचाररत दुई जाने डेंगु संक्रमितके मृत्यु हुइल बा । बर्दियाके ८५ वर्षीय पुरुष ओ कैलाली टीकापुरके १२ वर्षीया बालिकाके मृत्यु हुइल अस्पताल जनैले बा ।

अस्पतालके मेडिकल सुपरीटेन्डेन्ट डा. बद्री चापागाईंके अनुसार भदौ १४ गते ओ १९ गते भर्ना हुइल ओइनके बुधके एक्के दिन मृत्यु हुइल हो । आब बाँकेमे नेपालगन्जके पाँच जानेसहित आठ जाने डेंगु संक्रमित उपचाररत बटै ।
बाँकेके सरकारी ओ टमान नीजी प्रयोगशालामे करल परीक्षणके क्रममे पत्ता लागल ११ जाने संक्रमितमन्से तीन जाने बाँके बाहेरके रहिट ।

टीकापुर अस्पतालमे थप ५ जननहननमे डेँगु

कैलालीके टीकापुर अस्पतालमे थप पाँच जनहनमे डेँगु डेखल बा । यी संख्या पछिल्का एकसातामे केल थपल हो । डेँगुके बिरामीमे चार जाने टीकापुर नगरपालिका ओ एक जाने लम्कीचुहा नगरपालिकाके रहहल बटै । ओइनके उपचार हुइटी रहल सह व्यवस्थापक उपेन्द्र शाह जानकारी डेलै ।

पछिल्का कुछ दिन यहोर अस्पतालमे डेँगुके बिरामीके संख्या ह्वाटे बह्रल बा । अभिन कतिपय बिरामी उपचारके लाग अस्पताल नइपुगल ओरसे यी संख्या ढेर हुई सेक्ना स्वास्थ्यकर्मी बटैठै । कतिपय बिरामी भर भरपर्दो उपचारके लाग नेपालगञ्ज लगायतके ठाउँमे गैल बटै । ओइनके आधिकारिक रेकर्ड टीकापुर नगरपालिकामे नइरहल बटाइल बा । कुछ व्यक्ति स्वास्थ्य समस्या गम्भिर हुइलपाछे उपचारके लाग नेपालगञ्ज पुगल जनस्वास्थ्य प्रवद्र्धन शाखा प्रमुख बलबहादुर रावल जानकारी डेलै ।

यी आघे टीकापुर अस्पतालमे नौ जनहनमे डेँगु डेखल रहे । यी संख्या सावन १ गतेसे भदौ १६ गतेसमके हो । नौ जाने मन्से टीकापुर नगरपालिकाके ३ जाने, जोशीपुर गाउँपालिकाके २ जाने ओ जानकी गाउँपालिकाके ४ जाने रहल बटै । ओइने मन्से ढेर जैसिन उपचारपाछे घर लौटल बटै ।

ओइनके जुरी अइना, मुरी बठैना, वाकवाकी लग्ना, थकान महशुस हुइना लगायतके लक्षण डेखल रहे । यी रोग एडिस जातके लामखुट्टेसे मनैनमे सर्ना करठ । यी सफा पानीमे अण्डा पर्ना ओ उहेसे मनैनमे सर्ना करठ । लार्भाके स्रोत पानी जमल डब्बा, प्लाष्टिकके बोत्तल, प्लाष्टिकके खोल, टायर, सिसी, ड्रम, बाटा, बाल्टिन, फूलदानी, गमला, कुलर, पानीके ट्याङकी हो ।