विपतपुरके आगलागी २७ घर निर्माण प्रक्रियामे
पहुरा समाचारदाता
हसुलिया, २४ भदौ । कैलालीके कैलारी गाउँपालिका–७ विपतपुर मुक्तकमैया बस्तीके २७ आगलागी पीडित परिवारके घर निर्माण प्रक्रिया सुरु हुइल बा ।
सुदूरपश्चिम प्रदेशके भुमि व्यवस्था तथा कृषि मन्त्रालयके आर्थिक सहयोगमे कैलारी गाउँपालिकाके पहलमे हेविटयाट नेपालके प्राविधिक सहयोगमे घर निर्माण हुइटी रहल गाउँपालिकाके प्रवक्ता तथा वडा–७ के अध्यक्ष दिपेन्द्रबहादुर बम बटैलै ।
गैल बैशाख ११ गते भीषण आगलागीहुके विपतपुर मुक्तकमैया बस्तीके २७ पूर्णरुपसे क्षति हुइल रहे । आगलागीसे रुपमे क्षति हुइल घर निर्माणके लाग घर नक्सा, घरके मोडल तयार ओ जग्गा नापजोख हुइल वडा अध्यक्ष बम बटैलै । निर्माण हुइना २७ घरके मापदण्डके लाग नक्सा गाउँपालिकासे पास कराई पर्ना बाँकी रहल बा ।
हेविटयाट नेपालके कार्यक्रम संयोजक राममनि चौधरी २७ घर निर्माणके लाग प्रक्रिया आघे बह्रल बटैलै । जेम्ने दुई ठो कोठा बरण्डा, ओम्ने जोरल एक ठो भन्सासहित ओ चर्पी रहना बा । कोठाके साइज १० वाई १२ रहना बा । घरके वाल पीभिसी व्लक ओ उप्पर जस्तापाता रहना उहाँ जनैलै ।
घर निर्माणके लाग वेसलाईन सर्वे करके विपतपुर गाउँमे घरनक्सा डेखैले बटी,’ संयोजक कहलै, ‘आब इष्टिमेट कैके आघे बह्रना हो । निर्माणके काम डसिया आघे सुरु कैना सोच बनैले बटी । आचारसहितासे नइछेक्लेसे सुरु करे सेक्जाई । विनियोजन हुइल रकममे कौनो नइहुई आचारसहिता नइरोकी कलेसे पक्का सुरु हुई ।’
विपतपुर बस्तीमे कित्ता नइमिलल ओरसे मिलैना काम हुइटी रहलफे उहाँ जनैलै । उहे विच सुदूरपश्चिम प्रदेशके भुमि व्यवस्था तथा कृषि मन्त्री विनिता चौधरी शुकके रोज अवस्था बुझे विपतपुर मुक्तकमैया पुगल रहिट ।
