लालबहादुर रत्गैया ओ अस्मिता चौधरी हुइलै मिस्टर एण्ड मिस थारु
काठमाडौं, २६ भदौ । चौथो संस्करणके मिस्टर एण्ड मिस थारुके उपाधि बर्दियाके लालबहादुर रत्गैया ओ अस्मिता चौधरी जित्ले बाटै ।
शनिच्चरके साँझ काठमाडौंमे हुइल ग्राण्ड फिनालेमे १६ जाने प्रतिस्पर्धीहे पाछे परटी बर्दियाके अस्मिता मिस थारुके उपाधि हात पारल हुइटी । उहाँ उपाधिसँगे ५० हजार रुपैयाँ नगद, क्राउन ओ अन्य टमान उपहार प्राप्त करल रही ।
चितवनके सोनुकुमारी महतो फस्ट रनरअप हुइली । उहाँ ३० हजारनगद प्राप्त करली कलेसे सेकन्ड रनरअप हुइल सप्तरीके सुदीक्षा चौधरी २० हजार रुपैयाँ हात पारल रही ।
ओस्टके १५ जाने प्रतिस्पर्धीहे पाछे परटी बर्दियाके लालबहादुर मिस्टर थारु २०२२ बन्ना सफल हुइल बाटै । उहाँ फेन उपाधिसँगे ५० हजार रुपैयाँ नगद ओ टमान उपहार प्राप्त करल रहिट ।
सप्तरीके रोशन चौधरी फस्ट रनरअप हुइलै । उहाँ नगद ३० हजार प्राप्त करलै कलेसे पर्साके लीलानाथ प्रसाद थारु सेकेण्ड रनरअप घोषित हुइटी २० हजार नगद प्राप्त करल रहिट ।
ओस्टके भोटिङमार्फत मिस्टर थारु २०२२ के पब्लिक च्वाइस अवार्ड बाराके राजीव चौधरी पैलै कलेसे मिस थारु २०२२ ओर पब्लिक च्वाइस अवार्ड उदयपुरके रन्जु चौधरी पैली । उहाँहुक्रनहे खल्ती एपसे गिफ्ट ह्याम्पर उपहार प्रदान करल रहे ।
विजेताहे प्रतियोगिताके मुख्य निर्णायक कलाकार तथा निर्देशक निश्चल बस्नेत, निर्णायक कलाकार प्रदीप चौधरी, जह इन्टरटेनेमन्ट प्रालिके प्रमुख कार्यकारी अधिकृत (सीईओे) सुरेश चौधरी, इभेन्ट डाइरेक्टर रुपेश चौधरी, निर्देशक जयस चौधरी लगायत पुरस्कार वितरण करल रहिट ।
थारु कला, संस्कृति प्रवद्र्धनके लाग हरेक बरस इ सौन्दर्य प्रतियोगिता आयोजना कैटी आइल बा । ग्राण्ड फिनालेमे उपाधिके लाग १७ महिला ओ १६ पुरुष कैके ३३ जाने प्रतिस्पर्धामे रहिट । प्रतियोगिताके लाग काठमाडौं, विराटनगर, सुनसरीके झुम्का, वीरगञ्ज, चितवन, बुटवल, कैलालीके टीकापुर ओ नेपालगञ्जमे अडिसन करल रहे ।
