भारतिय बनरक्षकसे दुई नेपालीहे कुटपिट

पहुरा समाचारदाता
हसुलिया, २६ भदौ । कैलालीके कैलारी गाउँपालिका–७ रतनपुरके दुई व्यक्तिनहे भारतिय बनरक्षकसे कुटपिट करले बटै ।

यिहे भदौ २३ गते भारतके दुधुवा नेशनलपार्कके बनरक्षकसे नेपाली सीमानामे आके नेपालीउप्पर कुटपिट करले रहिट । मोहन लडिया पार लठुवा सामुदायिक वनमे गैया,भैसिनीया चराई गैल रतनपुरके विसराम डगौरा ओ खेदप्रसाद चौधरीहे कुटपिट हुइल कैलारी गाउँपालिका–७ भुइयाफाँटा विओपीके प्रमुख डम्मर केसी बटैलै । यी घटना भदौ २३ गते हुइल मने अपनेहे भर भर्खर खबर हुइल उहाँ बटैलै । उहे बेला पत्ता हुइलेसे कुछ हुइठ, कुटपिट हुइल कना घटना पत्ता पाईबेर खोजतलास सुरु करल विओपी प्रमुख जनैलै ।

उहाँ कहलै, ‘घटना बुझेक लाग मै आज (अँटवार) दुपहर पारी गैल रहु । ओहोरके एसएसबीहेफे यी घटनाबारे पत्ता नइरहे । उहाँक एसएसबी बुझके खबर करब कहले बटै ।’
भुइयाफाँटा विओपीके प्रमुख केसी कहलै, ‘यी चाही बोर्डके इस्यु हो, ओइने हातहठियासहित चार सय मिटरभिटर नेपाली सिमानामे आके पिटले बटै, अइलेसे जानकारी कराई परठ । अपन खुशी असिक आके हर्कट काम करलेसे इस्यु बनेसेक्ना कहिके जानकारी करागिल बा ।’

एसएसबीसे कोडनेशन कैनाफे कहल विओपी प्रमुख केसी बटैलै । पिटुवा पाइल दुनु जाने धानवाली बचाइक लाग नेपाली भुमिमे बनाइल झोपरामे बैठल रहिट । भैसिनीया चराई गैल ओइनहे कठुवा चोराइल आरोप लगैटी कुटपिट करल बटागिल बा ।