डा. केसी धनगढीमेः साँझ ५ बजेसे २० औँ सत्याग्रह सुरु कैना

पहुरा समाचारदाता
धनगढी, २७ भदौ । चिकित्सा शिक्षा सुधारके अभियन्ता प्रा.डा. गोविन्द केसी आज सुदूरपश्चिम प्रदेशके राजधानी धनगढी आपुगल बटै । उहाँ आज साँझ ५ बजेसे २०औँ सत्याग्रह बैठे धनगढी आइल हुइट ।

डा. केसी अपन माग पूरा कैना सरकारहे दुई साताके अल्टिमेटम डेले रहिट । ‘काल्हसम सरकारके ओरसे माग सम्बोधन या वार्ता कुछ हुई की कना रहे मने सरकारके पक्षसे कौनो जवाफ नइआइल ओरसे मै सत्याग्रहके लाग धनगढी आइल बटु,’ डा. केसी कहलै, ‘देउवासे समय मागके आजसम झुलाइल मने अब्बे रेस्पोन्स नइकरलै, टबमारे धनगढीमे अनशन बैठम ।’
आज साँझ ५ बजेसे अनसन बैठना हुइलेसेफे सुरक्षाके कारण स्थान भर अभिन तय नइहुइल उहाँ बटैले बटै । डा. केसी अपने राखल माग ओ समाधानके खाकासमेत सरकारहे यी आघे बुझासेकल बटैले बटै ।

अब्बे डा. केसी धनगढीस्थित सुदूरपश्चिम प्रदेशसभाके परिसरमे रहल बटै । उहाँ नागरिक समाजके प्रतिनिधिसँग छलफल करटी रहल बटै । अपन मागप्रति प्रधानमन्त्रीसे बेवास्ता करल ओरसे प्रधानमन्त्रीके गृहक्षेत्रमे अनसन कैना निर्णयमे पुगल केसी बटैलै ।