फुलबाही कपरा घल्ना स्वास्थ्य मन्त्रालयके आग्रह
काठमाडौं, २७ भदौ । स्वास्थ्य मन्त्रालयसे कर्मचारीहुकनहे फुलबाही कपरा घल्ना आग्रह करले बा ।
मच्छरके कटाईसे सर्ना डेंगु रोगके प्रकोप बह्रल कहटी मन्त्रालयसे उहीसे जोगेक लाग फुलबाही कपरा घल्ना आग्रह करल हो । मन्त्रालयसे सोम्मार जारी करल सूचनामे लिखल बा, ‘डेंगु रोगके संक्रमणके जोखिम कम कैना कार्यस्थल वरपर निरन्तर सफा रख्ना ओ कार्यालय समयमे फुलबाही रहल झुलुवा अनिवार्य लगैना नेपाल सरकारके सक्कु कर्मचारी एवं सार्वजनिक, सामुदायिक ओ निजी क्षेत्रमे कार्यरत सक्कु कर्मचारीहुकनहे अनुरोध बा ।’
डेंगु एडिज नाउके मच्छरके कटाईसे सरठ । यी मच्छर खास करके सकारे ओ साँझके समयमे सक्रिय रहठ । टबमारे डेंगु रोग लग्नासे जोग्ना सबसे मजा उपाय कहल मच्छरके कटाईसे जोग्ना हो ।
मन्त्रालयके सहप्रवक्ता समिर कुमार अधिकारीके अनुसार मन्त्रालयसे प्रतिकार्य योजना बनाके टमान गतिविधि सञ्चालन करटी रहल बा । डेंगुके बह्रटी संक्रमणहे न्यूनीकरण कैना प्रदेश, जिल्ला ओ स्थानीय तहसंगके समन्वयमे मच्छरके लार्भा ‘खोज ओ नष्ट कर’ अभियानहे तीव्र बनाइल सहप्रवक्ता अधिकारी जानकारी डेलै ।
