बाल अधिकारके सवालमे प्रदेश स्तरीय गोष्ठी
पहुरा समाचारदाता
धनगढी,२७ भदौ । सुदूरपश्चिमके बाल अधिकारके सवालमे धनगढीमे छलफल हुइल बा ।
कन्सोर्टियम–नेपालके आयोजनामे हुइल कार्यक्रममे प्रदेशके दार्चुला बाहेकके ८ जिल्लाके बालबालिकाहुकनके सहभागितामे सोम्मार प्रदेश स्तरीय छलफल कार्यक्र हुइल हो । छलफलमे सुदूरपश्चिम प्रदेशके सवालमे ७ बुँदे घोषणापत्र जारी करटी सुदूरपश्चिम प्रदेशके सामाजिक विकास राज्यमन्त्री टेकबहादुर रैकाहे ज्ञापनपत्र बुझाइल बा ।
छलफलसे बालबालिकाके क्षेत्रमे कानुनी, नीति, रणनीति कार्यक्रम बढैना, बालकल्याण अधिकारीके व्यवस्था, बालकोषके व्यवस्था कार्यान्वयन बालमनोविज्ञान तथा सामाजिक कार्यकर्ता सम्बन्धित व्यवस्थाके प्रभावकारी कार्यान्वयन कैना सहजीकरण करे लगैना रहल बा । ओस्टेक करके बाल विवाह लगायत समाजमे व्याप्त सक्कु कुरितिके लाग काम कैना, सक्कु ठाउँमे बालबालिकाहुकनके अर्थपूर्ण सहभागिता सुनिश्चित बाल सहभागिता सम्बन्धि कार्यविधि निर्माण कैना, स्थानीय तहमे योजना प्रक्रियामे बालबालिकाके लाग कम्तिमे १० प्रतिशत बजेट विनियोजनके लाग आवश्यक सहजीकरण कैना, बालमैत्री स्थानीय शासनके अवलम्बन, सुचकके प्रभावकारी कार्यान्वयन कैना ओ प्राकृतिक प्रकोप, जलवायु परिर्वतनमे बालबालिकामे पर्ना असर बारेमे आवश्यक जनचेतनामुलक कार्यक्रमके आयोजना कैना रहल बा ।
कार्यक्रममे सुदूरपश्चिम प्रदेशके सामाजिक राज्यमन्त्री टेकबहादुुर रैका प्रदेश सरकार वालवालिकाहुकनके अधिकारमे गम्भीर रहल बटैलै । उहाँ ज्ञापनपत्रमे उल्लेख बुँदामे प्रदेश सरकार कार्यन्वयमे प्रतिवद्धता व्यक्त करलै ।
कार्यक्रममे कन्सोर्टियम–नेपालके उपाध्यक्ष सन्तोष महर्जन बालबालिकाहुकनके क्षेत्रमे अपनेहुक्रे दुई दशकसे काम करटी आइल बटैटी अभिनफे गम्भीर रुपमे लागल बटैलै । ओस्टेक कार्यक्रममे वल्र्ड भिजन इन्टरनेशनल नेपालके सुदूरपश्चिम फिल्ड म्यानेजर चेतराज भट्टराई बालबालिका सवालमे तीनु सरकारसे गम्भीर रुपमे लेहे पर्ना बटैलै । ‘पछिल्का समय बालिकाहुक्रे असुरक्षित हुइल बटै,’ उहाँ कहलै, ‘सरकारसे गम्भीर बन्न आवश्यक बा ।’
नेपाल पत्रकार महासंघ कैलालीके अध्यक्ष हिमालय जोशी बालबालिकाके क्षेत्र संचारकर्मीनहुकन कलम चलैना आग्रह कैना बटैलै । कार्यक्रममे सुदूरपश्चिम प्रदेशके ८ जिल्लाके बालबालिका तथा अभिभावकहुकनके सहभागिता रहल रहे । कार्यक्रम बाल सल्लाहकार समितिके सदस्य खगेश्वरी ऐडीके अध्यक्षतामे सम्पन्न हुइल रहे ।
