कैलारीमे मानव अधिकार समुह पुनगर्ठन

पहुरा समाचारदाता
हसुलिया, २७ भदौ । कैलालीके कैलारी गाउँपालिकामे मानव अधिकार समुह पुनगर्ठन हुइल बा ।
गाउँपालिका अध्यक्ष राजसमझ चौधरीके वडका पहुना ओ उपाध्यक्ष भगवतीकुमारी चौधरीके विशिष्ट पहुनामे परियोजना परिचयात्मक तथा मानव अधिकार समुह पुनगर्ठन हुइल हो ।

समुहके अध्यक्षमे मानबहादुर चौधरी, उपाध्यक्षमे गीता चौधरी, सचिवमे ज्ञानु चौधरी ओ कोषाध्यक्षमे लक्ष्मी भुल रहल बटै । ओस्टेक करके सदस्यमे केदारनाथ चौधरी, गीतादेवी चौधरी, विफनी चौधरी, नागेश्वरी चौधरी, बसन्त चौधरी ओ कुलराज चौधरी रहल बटै ।

कार्यक्रममे वडका पहुना गाउँपालिका अध्यक्ष राजसमझ चौधरी कार्यक्रम मानवअधिकार मैत्री बनाइक लाग अपने करे पर्ना सहयोग कैना बटैलै । विशिष्ट पहुनामे गाउँपालिकाके उपाध्यक्ष भगवतीकुमारी चौधरी परियोजना मजा ओ चित बुझटी रहल ओरसे कार्यक्रमके लाग पालिकासे सहयोग सहजीकरण कैना प्रतिवद्धता जनैलै ।

कार्यक्रममे इन्सेक सुदूरपश्चिम प्रदेश संयोजक खडकराज जोशी यी पालिकाहे मानव अधिकार मैत्री बनाइक लाग पहल रहना बटैलै । प्रदेश संयोजक जोशी सामाजिक न्यायके क्षेत्रमे काम कैना दाबी करटी आधारभूत मौलिक अधिकारके प्रत्यभुति कराइक लाग यी पालिका समन्वय करे सहयोग कैना अपिल करलै ।

बाल अधिकार, मानव अधिकारके क्षेत्रमे परियोजना तीन बरससम लाग रहना बा । जेम्ने विशेष करके पाँच ठो क्षेत्र समेटना जनागिल बा । परियोजना शिक्षाके अधिकार, स्वास्थ्यके अधिकार, वातावरणके अधिकार, लैङिक हिंसा विरुद्ध अभियान, जातीय विभेद सम्बन्धी क्षेत्रमे काम कैना प्रदेश संयोजक जनैलै । यी बरस बालबालिकाहुकनहे प्राथमिकतामे धारके ओइनके अधिकारके लाग ढेर वकालत कैना उहाँ बटैलै ।

परियोजना अन्र्तगत कैलारी गाउँपालिकाके दुई ठो विद्यालयहे छन्ना ओ बालअधिकार चेतना समुह गठन कैना उहाँ बटैलै । जेम्ने बालबालिकाहुकनहे सक्रिय बनाइक लाग टमान मेरिक क्रियाकलाप कैना कहल बा ।
कार्यक्रममे गाउँपालिकाके प्रमुख प्रशासकीय अधिकृत विर बहादुर ऐर, वडाहुक्रनफे सहभागिता रहल रहे ।